Wanneer die storie nie meer sin maak
2010-01-11 08:15
Verbeel jou iemand vertel 'n storie aan jou as kind.
Verbeel jou hierdie storie is nie sommer enige storie nie, maar die moeder van alle stories. Dit bevat 'n wêreldbeskouing wat alles onder die son verklaar; dit verduidelik die oorsprong van die heelal, die doel van die heelal en die rede waarom die heelal bly voortbestaan. Dit stip noukeurig uit wat bestaan en nie bestaan nie, wat goed en kwaad behels en hoe 'n lewe geleef moet.
Verbeel jou die storie vul jou met soveel ontsag en verwondering dat jy dit vir almal wat jy ken of teëkom met passie begin oorvertel. Verbeel jou dat jy nie anders kan nie, omdat jy naas die storie van kleins af ook geleer is dat dit verkeerd is om te jok.
Verbeel jou dat jou ouers jou altyd mooi laat verstaan het dat die goeie, die regverdige en die deugdelike altyd nagestreef moet word.
Verbeel jou hulle het jou geleer dat die waarheid altyd sal seëvier en dat dit nie goed is om mense te belieg en te bedrieg nie – dat jy nooit valse getuienis oor enigiets mag lewer nie, al is dit hoe groot of hoe klein.
Verbeel jou nou jy begin eendag oor die ongelooflike storie nadink en besef, tot jou skok, dat die verhaal wat alles onder die son verklaar heimlik vol foute is. Verbeel jou jy ontdek weersprekings, vind wanvoorstellings van die geskiedenis en kom op dinge in die grootse storie af wat skielik net nie meer vir jou sin maak nie.
Verbeel jou jy ontdek dat die storie wat alles oor alles oor alles vertel nie die volle waarheid beet het nie.
Wat sou jy doen?
As jou ouers jou geleer het dat leuens verkeerd is en die waarheid altyd sal seëvier, sal jy waarskynlik hieroor begin praat met almal wat ook die storie ken. Jy sal hulle onthuts vertel van al die vreemdhede in die storie, al die gate, al die wanvoorstellings. Jy sal hulle prober vertel dat julle almal bedrieg is – dat die storie so waar as wragtig nie die volle waarheid oor alles bevat nie en dat die hele wêreld dringend moet hoor dat daar vir hulle gejok is.
Verbeel jou dan dat hierdie mense, in plaas daarvan om jou te bedank vir die leuens wat jy pas vir hulle oopgevlek het, jou hieroor begin kasty en hul pogings om die storie verder te versprei, bloot verskerp.
Verbeel jou dat jy van kleins af geleer word om altyd die waarheid te praat, maar dat mense jou uitskel, uitstoot en beledig sodra jy dit, volgens die beste van jou medewete, so eerlik as moontlik oor een, spesifieke storie probeer vertel. Verbeel jou die ontnugtering, die vervreemding en die pyn wat as gevolg hiervan in jou binneste begin sweer. Verbeel jou dat jy dan maar begin om skanse rondom jouself te bou waaragter jy alleen teen ‘n absurde wêreld begin baklei.
Verbeel jou jy begin ‘n wrok teenoor alles en almal koester, omdat die wêreld skielik baie skynheilig vir jou begin lyk.
Hartlik geluk. Jy weet nou hoe voel 'n militante ateïs.
– Johan Swarts is 'n skrywer, vervaardiger en sosiale mediakenner. Hy is 'n behendige fabriseerder van digitale media, lief vir filosofie en verknog aan musiek. Sy blog is te vinde by http://gormendizer.co.za.
Stuur jou kommentaar aan Johan
Neem kennis: Nuus24 is ten gunste van vryheid van spraak en 'n diversiteit van sienings. Die opinies van rubriekskrywers wat op Nuus24 gepubliseer word is hul eie, en verteenwoordig nie noodwendig die sienings van Nuus24 nie.