Vir wie stem ek dan?
2010-02-25 08:22
Suid-Afrika se twee mees prominente partye – die regerende ANC en die opponerende DA – is vir ‘n wyle al besig om niks meer as ‘n verleentheid vir Suid-Afrika te wees nie.
Intern is die regerende party besig om met sowel homself as sy koalisielede te baklei. Dit sit met ‘n loskop soos Julias Malema, wat nie sy oningeligte tong in sy mond kan hou nie en ‘n leier (en staatspresident) wat nie sy geslagsdeel in sy broek kan hou nie. Dit is ‘n lomp, opgeblase, populistiese liggaam wat lankal nie meer die rewolusionêre struggle-party vanmelewe is nie. (Of dan eerder – dit ís dalk nog steeds ‘n struggle-party – iets wat vir vandag se probleme weinig beteken). Trouens, nadat ‘n hele nuwe party verlede jaar weens gereelde onmin uit die ANC losgeskeur het, is Suid-Afrika se oudste bestaande politieke party steeds onstabiel.
‘n Mens sou hierop wou hoop dat daar ‘n opposisieparty is wat ten minste die teenoorgestelde vir die land kan verteenwoordig. Hoop, dalk. Rasionaliteit en ‘n sobere sin vir verantwoordelikheid. Maar waarmee sit ons?
Ons sit met die DA – ‘n amptelike opposisie wat skynbaar niks meer wil doen as om soos kefferbrakkies rondom die ANC se bene te hardloop en onverpoosd na hul haakskene te byt nie. Premier Helen Zille self – ‘n dame wat werklik van beter behoort te weet – is pal in die nuus, besig om die regerende party (en veral die president) uit hul sokkies te beledig. Dit is net ad hominems waar jy kyk – Zuma dit, Zuma dat, Malema sus, Malema so – tot so ‘n mate dat die party voorkom as ‘n liggaam wat nie werklik enigiets anders kan bied as ‘n ruwe, sluwe bietsfaait nie.
Die party hou glad aanlyn boek van elke groot uitgawe wat die ANC aangaan, met ‘n gepaardgaande holier than thou brokkie teks wat daarop dui dat daar eerder huise en onderwysers met die “spandabelrige” uitgawes gefinansier sou kon word. Dit is natuurlik ‘n ietwat naïewe argument – die ANC se uitgawes word nie sonder meer in die see gestort nie. (Trouens, dit word terug in die ekonomie gestoot – daai partytjiekos gaan nie hulleself maak nie – wat nooit ‘n slegte ding is nie.)
Suid-Afrika se regerende party is besig om in hul eie vonkelwyn te verdrink, terwyl die amptelike opposisie soos ‘n brandsiek brak wag vir ‘n geleentheid om die kos uit eersgenoemde se ingewande te skeur. Die regerende party gee (skynbaar) nie om wat met die land gebeur nie, terwyl die amptelike opposisie (skynbaar) nie besef dat hul immeraanwesige schadenfreude outomaties ook ‘n vet middelvinger vir alle Suid-Afrikaners se welsyn is nie. As die regerende party misluk, misluk almal immers.
Ons politiek is ‘n sirkus - wat seker ook nie juis iets nuut is nie. Tog kan ek nie help om my kop in skaamte te sak en te wonder vir wie op aarde ek in die volgende verkiesing moet stem nie.
AWB, dalk? Ten minste het hulle koeksisters...
– Johan Swarts is 'n skrywer, vervaardiger en sosiale mediakenner. Hy is 'n behendige fabriseerder van digitale media, lief vir filosofie en verknog aan musiek. Sy blog is te vinde by http://gormendizer.co.za
Stuur jou kommentaar aan Johan
Neem kennis: Nuus24 is ten gunste van vryheid van spraak en 'n diversiteit van sienings. Die opinies van rubriekskrywers wat op Nuus24 gepubliseer word is hul eie, en verteenwoordig nie noodwendig die sienings van Nuus24 nie.