Pappa se prinses?
2012-10-30 07:22
Elke keer wat ek 'n ouer hoor wat na sy of haar dogtertjie verwys as 'n prinses, gooi ek my hande in die lug en bietjies-bietjies in my eie mond op.
Sien, prinsesse woon in kastele. Prinsesse dra krale and armbande en oorbelle en waardevolle kroontjies vol edelgesteentes. Prinsesse eet uit duur borde met silwer eetgerei en drink smaaklike vloeistof uit sierlike kraffies wat met die klap van 'n vinger oor versierde kelke gekeer word.
Prinsesse se beddens word vir hulle opgemaak, hul kamers vir hulle skoongemaak, hul klere vir hulle pasgemaak. Prinsesse word bewaak en hul lewens teen alle koste beskerm - dikwels tot die dood. Prinsesse word nooit weerspreek nie; prinsesse is nooit verkeerd nie. Prinsesse word rondgedra, geloof, gedien, bedien.
Omdat hulle gebore is.
Kastele en paleise moet oor jare gebou word deur honderde messelaars en duisende hande-arbeiders. Talle van hulle sterf gewoonlik gedurende die konstruksieproses of word ernstig gewond wanneer rotse of balke op hulle val.
Edelmetale en -gesteentes moet moeisaam uit die grond gegrawe word in haglike omstandighede. Rotsstortings is algemeen en middeleeuse tegnologie kan water nie altyd behoorlik by skagte uitpomp nie. Baie myners verdrink dus gedurende die ontginningsproses, versmoor of word bloot deur rotsstortings verbrysel.
Dosyne lyfeienes moet 'n prinses se beddens opmaak, die kamers skoonmaak en haar klere netjies hou. As hulle egter van diefstal verdink word, die verkeerde woorde op die verkeerde tyd spreek of bloot te arrogant optree en die bewindhebber van die dag is in 'n slegte bui (of waansinnig van bloedskande), word hulle heel waarskynlik onthoof, deurboor of verkrag.
Krygsmagte jong mans moet hulself in wapenrustings tooi en by bloedige slagvelde instorm om die beskermwerk te doen. In doodsangs moet hulle slagare, ingewande en ledemate prysgee sodat die prinses in haar kasteel, omring deur alles wat sy ooit wil hê, aan die lewe kan bly.
Duisende mense moet beseer word, gekrenk word en gewelddadig sterf vir een dogtertjie. Talle moet verontmenslik en verneder word sodat een bloedjie se grille en geite in eindelose voortsetting bevredig kan word.
Omdat sy gebore is – slegs omdat sy nie in 'n geboortekanaal gesterf het nie – hoef sy tot haar dag des doods nooit 'n vinger te lig nie.
Wanneer jy weer met jou dogtertjie praat en op die punt is om haar 'n prinses te noem, vra jouself gerus eers mooi af of dit is wat jy haar wel wil noem – 'n bedorwe, nuttelose, onproduktiewe monarg wat op die lyding van ander teer om te kan voortbestaan.
Mag dit nooit jou kind se droom wees om 'n prinses te raak nie. Mag jy nooit na haar verwys as die opperskakel in 'n onvolhoubare nagmerrie van sweet en bloed waar sy die enigste begunstigde is en boonop dink sy kom dit toe nie.
Jy sal eintlik maar net besig wees om jou eie vlees en bloed 'n massamoordenaar te noem.
– Johan Swarts is 'n skrywer en vervaardiger. Sy blog is te vinde by http://gormendizer.co.za, en jy kan hom hier volg op Twitter.
Stuur jou kommentaar aan Johan
Neem kennis: Nuus24 is ten gunste van vryheid van spraak en 'n diversiteit van sienings. Die opinies van rubriekskrywers wat op Nuus24 gepubliseer word is hul eie, en verteenwoordig nie noodwendig die sienings van Nuus24 nie.
