Oom Paul, en dan ons
2010-11-12 05:56
Die ANC-jeugliga se aandrang dat Paul Kruger se standbeeld van Kerkplein in Pretoria verwyder moet word, is belaglik, maar bring daarmee saam 'n interessante vraagstuk oor Afrikaners se kulturele kleinood.
Enigiemand wat die moeite doen om die naam "Paul Kruger" by Google in te sleutel, sal vinnig ontdek dat die man niks met apartheid of die onderdrukking "of our people" waarna die jeugliga verwys, te make gehad het nie. Om die standbeeld op grond hiervan te wil verwyder, spreek van onkunde en onverdraagsaamheid. Verdere redenasie hieroor is nie regtig nodig nie (nie dat 'n rasionele argument in ieder geval sal werk nie).
Verdere argumente oor die storie sal niemand boonop baat nie, omdat dit duidelik is dat die jeugliga weer 'n storm in 'n teekoppie probeer skep ten einde aandag van belangriker kwessies af te trek, nes die “Skiet die Boer”-gesingery begin is kort ná Malema se bates onder loep gekom het in die media. Om verontwaardig saam te skree, is presies wat van Suid-Afrikaners verwag word.
'n Vraag wat ontstaan oor die verdediging van oom Paul, is hoekom hy so belangrik vir so baie mense is. Die vanselfsprekende antwoord is: die Voortrekkers, die boererepublieke, die mitologie rondom die Slag van Bloedrivier – al hierdie dinge is belangrik vir die Afrikaner. Dis deel van ons geskiedenis, van die storie wat ons gemaak het wat ons vandag is.
Ook dít is ’n gegewe wat, hoewel almal nie noodwendig meer met die storie identifiseer nie, nie juis bespreek of aangeval hoef te word nie. Of jy daarvan hou of nie: as jy 'n Afrikaner is (al smaak jy nie die etiket so kwaai nie) is dit deel van jou verlede.
Juis hier duik die vraagstuk op. Oom Paul het sy vurige toesprake in die Boererepublieke meer as 'n honderd jaar terug gelewer. Vandag is hy net 'n vae herinnering, 'n trotse dog lewelose karakter op ’n stadsplein op wie se deurwinterde kop voëls hulself verlig. Hy het 'n belangrike rol in die geskiedenis van Suid-Afrika gespeel, maar wat van ons wat vandag verontwaardig is oor die versoek om hom te verwyder?
Watter rol gaan ons speel?
Wie gaan ons volgende groot Afrikaanse digters en musici raak oor die volgende paar dekades? Wie gaan ons leiers wees? Ons helde? Oor wie se patriotisme gaan ons eendag stories vir ons kinders vertel? Op wie gaan ons trots wees?
Dit kan tog nie net ouens wat rugbyballe rondgooi en daarna met die woord “Jesus” op hul t-hemde pronk, glibberige platemaatskappye wat stamptreffers by ons kele afdruk en elke aangeplakte superster wat weekliks op die voorblaaie van supertydskrifte pryk, wees nie, kan dit?
Die beswaar oor die kritiek teen daai standbeeld is meer as geregverdig. Is dit egter waar dit gaan bly? Gaan ons vir die res van ons bestaan fikseer op die goeie dinge uit die verlede of gaan ons ’n punt daarvan begin maak om vandag, hier en nou, self ’n bydrae tot Suid-Afrika te lewer waarvoor iemand dalk eendag ’n nuwe standbeeld sal wil oprig?
Stuur jou kommentaar aan Johan
Neem kennis: Nuus24 is ten gunste van vryheid van spraak en 'n diversiteit van sienings. Die opinies van rubriekskrywers wat op Nuus24 gepubliseer word is hul eie, en verteenwoordig nie noodwendig die sienings van Nuus24 nie.