Net nóg 'n kans om die raspot te roer

2011-09-22 07:45

Wanneer 'n mens die radio aanskakel of 'n koerant optel en hoor Allan Boesak ondersteun Desmond Tutu se voorstel van ’n welvaartsbelasting vir wittes, wil jy summier uitbars van die lag. Nie op die uitgelate, gelukkige manier wat die meeste mense gewoonlik lag, of droog en sardonies, soos iemand met schadenfreude nie. Nee: jy wil eerder manies begin giggel terwyl skuim by jou mondhoeke uitborrel.

Jy wil dit doen nie omdat jy noodwendig dink die idee is belaglik nie, maar omdat jy ’n sterk spesmaas het dat die manier waarop daar oor Boesak se toespraak verslag gelewer word, ooreenstem met die manier waarop daar skaars ’n paar weke gelede oor Tutu verslag gelewer is. (Tutu, indien jy vergeet het, het by ’n boekbekendstelling oor appels gepraat. Hy is hierna deur die media geskets as iemand met ’n nydige wrok teen pere.)

Boesak het die Steve Biko-gedenklesing oor Swart Bewussyn by die Universiteit van KwaZulu-Natal gelewer. Hiertydens het hy (volgens oorlewering) onder meer genoem dat hy Tutu se idee van ’n welvaartsbelasting vir wittes ondersteun en dat wittes volgens hom liewer vir Mandela as vir Jesus is.

Die geldigheid van sy woorde al dan nie: dit kon tog kwalik die bestek van sy hele lesing gewees het, nie waar nie? Toets dit vir jouself: gaan badkamer toe met ’n stophorlosie, betrag jouself in die spieël, druk die toestelletjie se knoppie en roep kordaat uit:

“Ek ondersteun Tutu se idee van ’n welvaartsbelasting vir wittes! En wittes is liewer vir Mandela as vir Jesus”.

(Woerawarra jou arms dramaties vir ekstra effek.)

Indien jou stophorlosie normaal funksioneer, behoort dit jou nie langer as tien sekondes te neem om hierdie woorde te uiter nie.

Kom ons wees vrygewig en neem aan dat dit Boesak ’n volle twintig sekondes geneem het om dit te sê. (Hy’s ’n indrukwekkende spreker, so die kans is groot dat hy ’n pregnante pouse of twee tussen sy woorde ingewerk het.) Kom ons wees verder konserwatief en skat die lengte van sy lesing op 40 minute. Sou ons die twintig pregnante sekondes hiervan aftrek, laat dit ons met ’n oorblywende 2380 sekondes, of 39,75 minute.

Die vraag ontstaan dan vanself: wat het hy in daardie oorblywende tyd gesê?

Sekerlik, gegewe dat hy die Steve Biko-gedenklesing gelewer het, het hy die meeste van die tyd aan die idees van hierdie uitmuntende denker gespandeer? Sekerlik het hy die grootste gedeelte van sy lesing aan gedagtes oor die konsep van Swart Bewussyn gewy? Oor die relevansie daarvan in ’n hedendaagse Suid-Afrika?

Doen ’n mens egter ’n vinnige internetsoektog na onlangse nuus oor Boesak, word jy met die volgende opskrifte begroet:

Boesak steun Tutu oor welvaartbelasting

Whites 'love Mandela more than Jesus'?

Boesak lashes out at whites?

Whites trapped in a sense of denial

So asof die volledige toespraak oor wittes en hul onvermoë om te versoen gegaan het. Al 2 400 konserwatief geskatte sekondes daarvan. Asof  almal soos een man besluit het: die joos met die res van sy toespraak en die kruks van die saak: kom ons roer die raspot!
 
Verskoon my. Ek het pas onbedaarlik om die mondhoeke begin skuim.

– Johan Swarts is 'n skrywer en vervaardiger. Sy blog is te vinde by http://gormendizer.co.za, en jy kan hom hier volg op Twitter.

Stuur jou kommentaar aan Johan

Neem kennis: Nuus24 is ten gunste van vryheid van spraak en 'n diversiteit van sienings. Die opinies van rubriekskrywers wat op Nuus24 gepubliseer word is hul eie, en verteenwoordig nie noodwendig die sienings van Nuus24 nie.