Landelike SA ‘n kruitvat

2012-10-11 08:43

Die heersende retoriek oor plaasmoorde herinner aan die bevindinge van "Team B" tydens die Koue Oorlog.

Team B was 'n taakspan, saamgestel deur George H.W. Bush, wat CIA-data oor die Sowjetunie moes ontleed in 'n poging om tot ander gevolgtrekkinge as die CIA self te kom.

Die CIA se standpunt in daardie spesifieke stadium was dat die Russe nie 'n wesenlike bedreiging vir Amerika ingehou het nie, aangesien hul weermag besig was om in een te stort weens die ekonomiese chaos wat in die Sowjetunie geheers het.

Team B het hiervan verskil. Die afwesigheid van 'n aanduiding dat die Kremlin Amerika suksesvol sou kon of wou binneval, het hulle gesê, was nie rede om te glo dit kan nie gebeur nie. Trouens, dit was rede om die teenoorgestelde te glo.

Volgens die taakspan het dit onder meer beteken dat die Russe voertuie en wapens ontwerp het wat so gesofistikeerd was dat dit bloot onopspoorbaar was. Wat op die oppervlak na 'n kwynende weermag gelyk het, het hulle volgehou, was eintlik 'n verskriklike oormag, reg om te eniger tyd toe te slaan.

Geen bewyse kon hiervoor geopper word nie. Die CIA het hulle van wensdenkery beskuldig. Team B het egter volgehou hulle was reg en het hul "bevindinge" kort daarna aan die pers laat uitlek, wat dit alte graag verslind het.

Team B se idees het nie met die werklikheid gestrook nie, maar dit het vir hulle nie saakgemaak nie. Hulle het onwrikbaar geglo hulle was reg - vir hulle was dit voldoende stawing.

Plaasmoorde in Suid-Afrika is 'n grieselrige realiteit. Lyke lieg nie en syfers toon dat iets tussen 2 500 en 4 000 mense (afhangende van wie jy glo) reeds op Suid-Afrikaanse plase vermoor is sedert die 1990's. Van hierdie moorde is uiters gewelddadig en sluit soms verkragting in.

Nieteenstaande 'n komitee se navorsing oor die moorde wat aantoon dat die oorgrootte meerderheid van die aanvalle apolities is, is die heersende retoriek in konserwatiewe Afrikanerkringe dat die teenoorgestelde in werklikheid geld.

Plaasaanvalle, reken hulle, is die doen en late van die ANC en die kommuniste wat boere van hul plase wil afdryf: die swart man wat die wit man teen alle koste wil uitmoor. Volgens hulle is plaasaanvalle georkestreerde volksmoord, aangeblaas deur politici soos Julius Malema en liedere soos "Aw Dubul'ibhunu".

Stawing hiervoor word nooit verskaf nie. Die idee word as so voor die hand liggend beskou dat almal dit sommerso aanvaar sonder om die meriete daarvan te oorweeg. Nes die geval met "Team B" se hersenskimme was, blyk die enigste stawing vir die politieke aard van plaasmoorde te wees: "ons is reg, want ons glo ons is reg".

In Amerika het "Team B" grootliks bestaan uit sogenaamde "Neo Conservatives". Hul leuen het Ronald Reagan gehelp om die Withuis te betree en kolossale militêre uitgawes (wat sedertdien al normaal geraak het vir Amerika) van stapel te stuur. Amerika was bang, 'n verbeelde Kremlin moes teen alle koste gestop word en sommige Amerikaanse entiteite het sommer baie hierby gebaat.

Kyk 'n mens na die profiele van bekendes wat die meeste geraas oor plaasmoorde maak, is dit opvallend dat baie van hulle, nes die neo-konserwatiewe Amerikaners, 'n sterk insentief het om die mite van die "swart oormag" wat die "beskaafde wit man" probeer uitroei, lewendig te hou.

Hoe banger die volk, wil dit voorkom, hoe beter vir albumverkope.

Intussen is daar talle getraumatiseerde plaasboere en -werkers wat dubbeld so bang is, omdat hulle naas die afgryslike herinneringe aan die aanvalle ook opgeskeep moet sit met 'n verskriklike vrees vir 'n hersenskim opgetower deur laakbare opportuniste wat nie skroom om te profiteer uit hul leed nie.

Rusland bestaan. Plaasmoorde gebeur. Niemand kan stry met die feite nie. Die interpretasie van hierdie feite is egter nie altyd so akkuraat as kan kom nie – en dit maak van landelike Suid-Afrika 'n kruitvat.

 – Johan Swarts is 'n skrywer en vervaardiger. Sy blog is te vinde by http://gormendizer.co.za, en jy kan hom hier volg op Twitter.

Stuur jou kommentaar aan Johan

Neem kennis: Nuus24 is ten gunste van vryheid van spraak en 'n diversiteit van sienings. Die opinies van rubriekskrywers wat op Nuus24 gepubliseer word is hul eie, en verteenwoordig nie noodwendig die sienings van Nuus24 nie.