Huigelagtig... maar darem polities korrek
2012-07-24 07:19
Daar is min dinge so huigelagtig as 'n liberal.
Case in point: dis tans weer Ramadaan – die tyd wanneer Moslems vas en almal wat nie regtig daaroor omgee nie hulle alle sterkte daarmee toewens.
"A blessed Ramadaan to all our customers!", sien 'n mens nou weer op kennisgewingborde voor al wat 'n winkel is. Nie omdat hulle omgee nie, maar omdat hulle profyt wil maksimaliseer.
"En dan, 'n laaste punt op die agenda," kondig bestuurders by maatskappye dit tydens vergaderings af: "sterkte aan al ons Moslem-kollegas wat begin vas het in die heilige maand van Ramadaan. Ons dink aan julle in hierdie spirituele tyd van introspeksie en sielsoekery!"
En dan natuurlik: "Ramadaan mubarak to all my muslim friends!" – die sprankelende gebrabbel van al wat 'n liberal op Facebook is.
Al drie – die winkels, die bestuurders en die liberals – doen dit nie omdat hulle oortuig is dat Ramadaan 'n geseënde of 'n spirituele tyd is of moet wees nie (hoewel ek seker is daar is uitsonderinge), maar omdat hulle polities korrek probeer wees.
Die verskil tussen die liberals en die res is dat die res ten minste konsekwent is.
Kom Kersfees, is die winkels, die topbestuur en hul kopieskrywers ewe gretig om soortgelyke boodskappe van seën en voorspoed aan kliënte en werknemers oor te dra. Dan word kersliedjies tot vervelens toe gespeel en feestelike simbole graag uitgestal tussen kos en klere. Die liberal, daarenteen, kan dikwels nie minder hieroor omgee nie.
Oor Kersfees sal hy sarkastiese aanmerkings maak, uitvaar teen die gebruike van 'n fees wat volgens hom in elk geval 'n heidense oorsprong het of bloot swyg. Hy sal nie voorspoed en vrede vir 'n enkele Christen toewens of toepaslike slagspreuke uiter nie. Hy sal prentjies van Zombie Jesus op sy Facebook-muur plaas en opmerk hoe belaglik Christene nou eintlik is omdat hulle nog steeds in feëverhale glo – dit alles natuurlik met gepaardgaande skakels na teenbewyse en, oorhoofs, 'n ordentlike dosis schadenfreude.
"Tsk, al weer die dom Christene", is die boodskap dan.
Maar oor Ramadaan? (Of Rosh Hashannah? Of Diwali?) Hieroor het hy net die kuisste, die puurste, die eerbaarste woorde van solidariteit en bemoediging kwyt te rake.
Ander opportuniste is ten minste ewe polities korrek in hul ophemeling van dinge waaroor hulle nie werklik omgee nie. Liberals (oftewel "bleeding heart liberals", soos die begaafde denkers aan die onderkant van die Afrikaanse internet se nomenklatuur voorskryf) is egter skaamteloos huigelagtig hieroor.
'n Mens sou hoop dat mense wat in die openbaar verklaar dat hulle 'n broertjie dood het aan georganiseerde godsdiens die moeite sou doen om inderdaad negatief oor alle georganiseerde godsdienste te wees. Op die minste sou 'n mens verwag dat persone wat hulself as "liberaal" en "vrydenkend" tipeer oor die vermoë beskik om te besef dat positiewe uitsprake oor een teïstiese godsdiens inkongruent is met negatiewe uitsprake oor 'n ander.
Helaas.
Maar, hei, ten minste weet hulle "Ramadaan" kom voor "mubarak".
– Johan Swarts is 'n skrywer en vervaardiger. Sy blog is te vinde by http://gormendizer.co.za, en jy kan hom hier volg op Twitter.
Stuur jou kommentaar aan Johan
Neem kennis: Nuus24 is ten gunste van vryheid van spraak en 'n diversiteit van sienings. Die opinies van rubriekskrywers wat op Nuus24 gepubliseer word is hul eie, en verteenwoordig nie noodwendig die sienings van Nuus24 nie.
