GPS-koördinate, 'n sportmotor en 'n blink diamant
2012-12-20 08:16
Ek het die naweek verloof geraak aan die meisie van my drome. Almal wil sedertdien weet hoe dit gebeur het, so ek het besluit om 'n bondige opsomming van dié heuglike dag neer te pen en hier te laat publiseer ten bate van die weetgieriges.
Dit het alles begin toe ek die GPS-koördinate van 'n romantiese ligging aan haar verskaf het. "Dé, my skat," het ek gesê en 'n 24 karaat goue plaat met die lengte- en breedtegraad daarop gegraveer in haar hande gestop. Ek het geheimsinnig omgedraai, die sleutels na 'n Bugatti Veyron Super Sport oor my skouers na haar geslinger en myself na die naaste vliegveld gehaas.
Daar gekom het ek in 'n helikopter geklim met slegs 'n rugsak, 'n ring en 'n roos. Ek het die loods instruksie gegee om na dieselfde koördinate te vlieg as waarna ek haar gestuur het en die roos stewig tussen my tande vasgebyt.
Ons het net mooi betyds bo die aangewese plek begin sweef toe die Veyron kilometers onder ons opgedaag het. Ek het die ring in die rugsak versteek, seker gemaak my valskerm van suiwer katoen sit reg en toe uit die helikopter gespring en na die aarde geklief teen 'n Spartaanse tempo.
Sy het skaars kans gehad om haar hare in stadige aksie los te skud toe ek reg voor haar neergestryk het. Sy was heeltemal verras en het iets ouliks begin sê, maar in een soomlose beweging het ek my wysvinger sagkens teen haar lippe gedruk, die roos tussen my tande uitgehaal en glimlaggend teen haar borskas geplaas.
Ek trek toe 'n luukse piekniekmandjie, silwerware en 'n violis met 'n Stradivarius uit die rugsak en dis 'n romantiese ete vir twee op.
Ons het onsself trommeldik geëet aan kreip en aarbeie. Hierna het ek vir haar liefdesgedigte van Catullus en Breytenbach voorgelees op die maat van die violis se interpretasies van Brahms en Chopin.
Toe sy dit die minste verwag, het ek op my knieë gegaan, die mees romantiese toespraak in die geskiedenis van die aarde gelewer en haar gevra om op te kyk na die lug. Daar, lewensgroot uitgekerf in stratuswolke, was die groot vraag: sou sy haarself met my in die eg verbind tot in lengte van dae?
Sy het ja geantwoord en ek het die ring te voorskyn gebring. Dit had 'n kolossale diamant, het geblink met die glans van 'n duisend sonne en was eertyds verantwoordelik vir sewe oorloë, drie sluipmoorde en agt demokratiese revolusies.
Toe ek dit aan haar vinger sit, het vuurwerke in die verte ontplof en skoenlappers en duiwe met goue vere die lug in gevlieg. 'n Strategies geplaasde simfonie-orkes het triomfantelike kadense gespeel, die kamera het stadig na bo beweeg en die wêreld het verdof.
Ons het in die sportmotor geklim en die sonsondergang binnegery.
– Johan Swarts is 'n skrywer en vervaardiger. Sy blog is te vinde by http://gormendizer.co.za, en jy kan hom hier volg op Twitter.
Stuur jou kommentaar aan Johan
Neem kennis: Nuus24 is ten gunste van vryheid van spraak en 'n diversiteit van sienings. Die opinies van rubriekskrywers wat op Nuus24 gepubliseer word is hul eie, en verteenwoordig nie noodwendig die sienings van Nuus24 nie.
