Dís wat fout is met iPhone 5
2012-09-20 08:44
Die vyfde iPhone is onlangs vrygestel. Ten spyte van louwarm resensies het meer as twee miljoen mense dit reeds bestel – iets wat 'n mens seker nie moet verbaas nie, aangesien gebruikers hierdie produk selde met hul verstande aanskaf.
Daar is nie juis iets slegs wat 'n mens oor die nuutste iterasie van Apple se selfoon kan sê nie. 'n Mens sou seker daarop kon wys dat die selfoon se skraler dikte 'n pseudo-prestasie is, aangesien dit ook hoër as vorige weergawes is (sekerlik is 'n dunner toestel slegs iets om oor huis toe te skryf as die res van die afmetings dieselfde gebly het?), maar dan sou 'n mens jouself ook moet herinner dat jy besig is om muggies te sif oor 'n paar millimeter staal.
Bowenal moet 'n mens toegee: die iPhone is 'n goeie selfoon. 'n Uitstekende een, selfs. Dit was van die begin af. Apple maak goeie hardeware en alles wat hulle ontwerp, is maklik om te gebruik. Dit is trouens so maklik dat 'n mens nie twee keer hoef te dink oor wat jy moet doen om vir die eerste keer daarmee te werk nie. "Dit werk net", was nog altyd die maatskappy se mantra en het hulle in staat gestel om produkte te maak wat selfs die grootste leke kan gebruik. In hul eie woorde: "when something exceeds your ability to understand how it works, it sort of becomes magical."
Oumas dwarsoor die wêreld weet dus nou intuïtief hoe om prentjies van katte op iProdukte te roteer. Dis seker goed en wel, maar 'n mens moet wonder of hierdie obsessie met gebruikersvriendelikheid (en die manier waarop Apple se aanhangers dit aanprys) geregverdig is.
Ten diepste is dit uiters minagtend, aangesien dit aanneem gebruikers is nie in staat daartoe om vir hulself te dink nie.
Niemand het immers die eerste maal by 'n kar ingeklim en "net geweet" hoe alles werk of leer lees en sommer "net geweet" wat om met al die karaktertjies op die flitskaarte te doen nie. Mense wat die eerste maal probeer om enigiets ingewikkelder as toebroodjies vir aandete voor te berei, weet ook nie "sommer net" hoe elke liewe kombuisimplement werk en wat hoe lank teen watter temperatuur warm gemaak moet word nie. In al hierdie gevalle moes mense die moeite doen om vir hulself dink.
Intuïsie kan 'n mens net so ver bring – daarna moet 'n mens jou brein inspan en kennis begin assimileer. Apple (en die generasie UX-kenners wat hulle help inspireer het) se klem op bruikbare sagteware is oordrewe. Uitmuntende interfaces is nie regtig so belangrik soos die vermyding van slegte interfaces nie. 'n Kar met 'n ongemaklike stuurwiel kan steeds bestuur word; 'n kar daarsonder is disfunksioneel.
As jy kan lees, kan jy waarskynlik enige toestel met 'n middelmatige interface bemeester – en dan verval die magiese waarde van intuïsie waarop Apple so dikwels steun heeltemal.
Apple-aanhangers mag dit dalk moeilik vind om te glo, maar contrary to popular belief is dit soms goed vir mense om nuwe dinge te leer. Gebruikers mag dalk glo hulle beleef iets magies, maar in realiteit geld die volgende: “when something exceeds your ability to understand how it works, you’re not smart enough.”
Daar is waarskynlik niks fout met die iPhone 5 nie – en dis dalk juis die probleem.
– Johan Swarts is 'n skrywer en vervaardiger. Sy blog is te vinde by http://gormendizer.co.za, en jy kan hom hier volg op Twitter.
Stuur jou kommentaar aan Johan
Neem kennis: Nuus24 is ten gunste van vryheid van spraak en 'n diversiteit van sienings. Die opinies van rubriekskrywers wat op Nuus24 gepubliseer word is hul eie, en verteenwoordig nie noodwendig die sienings van Nuus24 nie.
