Die skoen pas al te goed
2009-12-03 08:47
Onlangs help ek my meisie by haar studentehuis op Stellenbosch uittrek. Die spiertier wat ek is, word ek toe die taak opgelê om sakke en bokse vol meisiesgoed na 'n boordensvol blou karretjie te dra. Uit die aard van die saak was baie van die bokse se inhoud aan my bekend, maar veral twee pakkies het my oog getrek.
Dit was vol skoene. Twee sakke tjok en blok volgeprop met elke soort skoen op aarde. Hoë hakskoene, sandale, stewels, plakkies, tekkies, skoene met ronde punte, skoene met skerp punte, skoene met oop punte, vaal skoene, swart skoene, rooi skoene, bont skoene.
Daar was baie skoene. Baie. Selfs van daardie onooglike broodmandjies met die krokodilhandelsmerk wat elke tweede Afrikaner teen alle goeie verstand in 2007 oor hul voete laat glip het. (In haar verdediging – dit was vroue-Crocs. Dis darem 'n rapsie meer vleiend as die mansweergawe. Net-net.)
Nou kyk, ek is nie 'n chauvinis nie. Meestal nie. Ek het feminisme op universiteit bestudeer en beskou myself as 'n liberale feminis. (Meestal.) Ek dink De Beauviour se The Second Sex moet op skool saam met 'n goeie dosis Wittgeinstein en Nietzche vir kinders aangebied word. Ek reken geslagrolle – veral in huwelike – is te dikwels onsin (as jy 'n rol moet speel in die intiemste verhouding wat jy waarskynlik ooit in jou lewe gaan hê, wie op aarde is julle werklik? Is dit nie belangriker om jouself te wees nie?).
Ek is nie juis een om my meisie te stereotipeer nie. Maar die skoene was baie. Regtig baie. En net daar, sonder dat ek dit kan help, vlieg al my liberale oortuigings deur die dak.
Sy’t so baie, dag ek by myself – en dan wil sy wragtig nóg hê! En hier’s net so baie klere in haar kas wat gelaai moet word – en sy sê elke keer as daar 'n funksie is sy’t nie genoeg daarvan nie. Dan wil sy nog gaan koop. Nooit genoeg nie. Spandeer net geld. Tipies vroumens!
Toe ek later die aand wegry om self te gaan inpak, nog half brommend oor die onnodige aantal bagasie, tref dit my skielik: ek is net so. Ek wil ook nog en nog en nog hê. Ek kry ook nie genoeg nie. Ek gee ook net geld uit. Net, nie met skoene nie.
Ek doen dit met sagteware.
Sedert verlede week het ek ten minste 5 nuwe programme afgelaai om mee rond te speel: Switcher 2.0 (sodat ek OSX se Exposé op Windows kan naboots), Celtx (sodat ek draaiboeke kan skryf), Advanced LANPump (sodat ek leggers gemaklik kan rondskuif), FileZilla (sodat ek leggers gemaklik oor die internet kan rondskuif), Notepad++ (dis net awesome) en 'n rits ander. Ek het onlangs Windows 7 gekoop – wat, terloops, briljant is – en my skootrekenaar opnuut vol sagteware geprop wat my dagtakies vergemaklik.
Van hulle moés ek natuurlik aflaai, want ek het my skootrekenaar se hardeskyf geformatteer. 'n Skoon installasie van enige bedryfstelsel is immers altyd beter. Ek het egter nie alles nodig gehad nie. Switcher 2.0, byvoorbeeld, is 'n oulike idee, maar Microsoft se Windows bedryfstelsels het my sedert Windows 3.1 gekondisioneer om programme te wissel met ALT+TAB en verskeie ander shortcuts. Switcher se funksionaliteit, hoewel handig, ontglip my dus, want ek is eenvoudig nie gewoond daaraan om dit te gebruik nie. So nou sit dit net daar op my hardeskyf (ek het intussen afgevee) en doen niks.
Maar ek kan nie genoeg daarvan kry nie - en wanneer ek weer 'n aftydjie het en lusteloos deur die kuberruim swerf, gáán nog 'n program my oog vang en ek gáán dit aflaai en dit gáán bes moontlik iets wees wat ek nooit weer gaan gebruik nie.
Net soos al die skoene.
Skoene kos veel meer as baie van die gratis sagteware wat ek so dikwels aas (sagteware is egter nie heeltemal gratis nie – dit kos bandwydte, tyd en elektrisiteit). 'n Mens sou seker ook kon argumenteer dat die monetêre waarde van 'n skoene dit 'n soort statussimbool maak wat opgegaar word juis omdat dit duur is en sodoende die eienaar daarvan 'n hoër posisie in 'n sosiale rangorde gee.
Dit verander niks daaraan dat ons dit nie werklik nodig het nie.
Die stereotipe dat vroue oppervlakkig en materialisties is – dat hulle net op die uiterlike fokus – het 'n waarheid beet, maar dit is nie waar van vroue omdat hulle vroulik is nie. Dit is waar omdat hulle mense is. Almal is op die een of ander manier so, of hulle nou skoene of sagteware assimileer. Mans ook.
So nou’s ek weer 'n propperse feminis. Meestal. En ek het nuwe respek vir vroue wat skoene opgaar en nog en nog en nog wil hê.
Dit herinner my: ek kort swart skoene...
– Johan Swarts is 'n skrywer, vervaardiger en sosiale mediakenner. Hy is 'n behendige fabriseerder van digitale media, lief vir filosofie en verknog aan musiek. Sy blog is te vinde by http://gormendizer.co.za.
Stuur jou kommentaar aan Johan
Neem kennis: Nuus24 is ten gunste van vryheid van spraak en 'n diversiteit van sienings. Die opinies van rubriekskrywers wat op Nuus24 gepubliseer word is hul eie, en verteenwoordig nie noodwendig die sienings van Nuus24 nie.