Lied van die alleenloper
2010-09-08 07:50
04:47 voormiddag, op ‘n Woensdag. Nog ‘n koppie goedkoop kitskoffie sluimer, nog ‘n sigaret sluier rook voor die oë, en Edith Piaf sing vir my.
“Non! Rien de rien, Non! Je ne regrette rien,” bulder sy. Losweg vertaal (dankie, o internet): “No, nothing of nothing, No! I don't feel sorry about anything.”
‘n Mens moet seker een of ander tyd gaan slaap. Maar dan, wie sal daar wees om 04:48 voormiddag op ‘n Woensdag saam te neurie met Edith Piaf?
As hier nou iemand in die bed agter my geslaap het, sou sy sekerlik al geskel het dat ek nou verdomp moet ophou neurie. As dit ‘n strelende geneurie was, sou dit seker ‘n ander geval wees, maar “neurie” is in hierdie geval eintlik maar bloot ‘n eufemisme vir “Sing kliphard saam in ‘n taal wat ek nie verstaan of kan praat nie”.
Dis eintlik baie nuttig om alleen te wees. Miskien sal dit die titel van my outobiografie wees.
Uit nuuskierigheid blaai ek nou net deur my Pharos-tweetalige woordeboek (want dit is wat alleenlopende slaaploses doen vir pret) en soek die Afrikaanse vertaling vir “solitude” op. Pharos reken dit is “Eensaamheid”.
A nee a! Eensaamheid en “solitude” is nie wedersyds uitsluitlik nie, maar beslis nie sinonieme nie. Eensaamheid impliseer ‘n verlange na geselskap. Solitude is veel eerder… afgesonderdheid. Ek het Pharos probeer bel, maar dit is 04:49 op ‘n Woensdag en hulle is nie op kantoor nie.
“Balayées les amours / Et tous leurs trémolos…”
(Broomed away my love stories / And all their tremble…)
Alleenlopende slaaploses hou ook van lysies maak.
Nadele van alleenlopendheid:
(1) Jy lyk stupid as jy alleen sokkie
(2) Niemand om jou interpretasies van interessante natuurverskynsels, flieks of musiek mee te deel nie
(3) Ernstige risiko van ‘n eentonige lewe
(4) Frustrasie
(5) Uiteindelike waarskynlikheid dat genepoel sal voortleef kwyn
Voordele van alleenlopendheid:
(1) Jy lyk in elk geval stupid as jy sokkie
(2) Niemand wat jou interpretasies van interessante natuurverskynsels, flieks of musiek sal misinterpreteer nie
(3) Vermy ernstiger risiko van ‘n eentonige lewe
(4) Vermy cliché-agtige gesprekke oor gedeelde frustrasies om braaivleisvure
(5) Uiteindelike waarskynlikheid dat genepoel sal voortleef kwyn
Ag, die lysie moet eintlik geskrap word, moontlike meriete ten spyt.
Alleenlopenheid en samelopenheid is nie teenpole nie. Hierdie “liefde”-affêre waaroor almal so praat is bloot ‘n lang eksperiment in die konsep van Samelopende Alleenlopendheid.
Samelopende Alleenlopendheid is in essensie ‘n gedoemde eksperiment, maar ook ‘n wonderlike een. Die soort eksperiment wat só ‘n gesprek onder wetenskaplikes kan ontlok:
“Doktor Steenkamp! Kom kyk net hier, wat maak hierdie mense!”
“Wat is dit, doktor Engelbrecht? Het u ‘n resultaat?”
“Nee, ek dink nie ‘n resultaat is in sig nie. Maar kyk net hoe gaan hulle te werk, hoe verander hulle, hoe bars en breek en bou en bevroetel hulle!”
“Jissie. Cool.”
Ons is van nature onvoorspelbaar, wild en wispelturig. Dis wat die Samelopende Alleenlopendheid so aardskuddend kief maak. Baie misinterpreteer hierdie verskynsel en beëindig die eksperiment by die eerste teken van ‘n gebrek aan uiteindelike resultaat. En met uiteindelike resultaat bedoel ek kategoriseerbare, klassifiseerbare stempels wat op die spulletjie gedruk moet word – ‘n terugkykende “vandag in die geskiedenis”-tipe insetsel.
Uiteindelike resultate is irrelevant. Deelname aan Samelopende Alleenlopendheid is fantasties interessant.
Maar dalk sê ek dit net omdat Edith dit hier langs my sit en sing, 05:00 op ‘n koue Woensdagoggend in Kaapstad:
“Car ma vie, car mes joies / Aujourd'hui, ça commence avec toi”
(Because my life, my joys / Today, they begin with you.)
– Henry Cloete is 'n inhoudsvervaardiger vir Nuus24.com.
Stuur jou kommentaar aan Henry
Neem kennis: Nuus24 is ten gunste van vryheid van spraak en 'n diversiteit van sienings. Die opinies van rubriekskrywers wat op Nuus24 gepubliseer word is hul eie, en verteenwoordig nie noodwendig die sienings van Nuus24 nie.