Soms mis ek Londen...
2012-04-18 11:52
Soms, net soms, mis ek Londen.
Die treine wat (die meeste van die tyd) betyds was, en altyd silwerskoon.
Die salaris wat selfs vir my, in 'n relatief junior pos, toegelaat het om die wêreld plat te reis.
Die vliegkaartjies wat ek gekoop het asof dit 'n brood by die kafee is. Die naweekuitstappies na grênd hotelle en eksotiese plekke.
Die vullisverwyderaar wat elke week Woensdag, amper klokslag om 10:00, die week se afval opgetel het. Wat nie 'n enkele week oorgeslaan het nie en my nooit lastig geval het vir 'n Krismisboks nie.
Die spotgoedkoop internetverbinding waarmee ek teen die spoed van wit lig ontelbare rolprente, musieksnitte en speletjies kon aflaai.
Die belaglik bekostigbare motor waarmee ek rondgerits het – 'n model wat ek nooit hier in Suid-Afrika sou kon bekostig nie.
Die netjiese hoofstraat van die distrik waar ons gewoon het. Nie 'n enkele slaggat of papiertjie nie.
Die gewoel op Leicester Square en in Oxford-straat, die musiekwinkels op Tottenham Court Road en die opwinding van die Weseinde.
Die kliniese doeltreffendheid van die polisie en die indrukwekkende manier waarop die plaaslike munisipaliteit my sake hanteer het. Nie 'n enkele fout op 'n rekening in dié geweste nie.
Die voordeur wat in twee jaar nooit behoorlik kon sluit nie, en die feit dat ons ons nooit eintlik daaroor bekommer het nie.
Aflewerings van e-Bay en Amazon en die plaaslike supermark...
Soms, net soms, mis ek Londen.
Maar ander dae, soos vandag, teug ek aan die Karoo-lug, kyk uit tot waar die bloed-rooi son oor die eindelose vlaktes sak en sny nog 'n stuk biltong af. Dan luister ek hoe die wind deur die doringbome huil en besef opnuut: al die ponde, eerstewêreld-luukses en eksotiese uitstappies in die wêreld is nie genoeg om die betowering van Afrika te laat vervaag nie.
Ek hoort hier. En dít kan níks verander nie.
Stuur jou kommentaar aan Reisiger
Neem kennis: Nuus24 is ten gunste van vryheid van spraak en 'n diversiteit van sienings. Die opinies van rubriekskrywers wat op Nuus24 gepubliseer word is hul eie, en verteenwoordig nie noodwendig die sienings van Nuus24 nie.
