Die vryste mens op aarde
2012-05-25 09:16
Micah True het verdwyn.
Die 58-jarige Amerikaner het op 'n Dinsdagoggend in Maart opgestaan, 'n oefenbroek en T-hemp aangetrek en alleen op die voetpaadjies van die Gila-wildernis in die wilde suidweste van Nieu-Mexiko gaan draf. Hy's nie weer gesien nie.
Dit het nie lank geneem voordat vrywilligers begin opdaag het om te help soek nie. (True was 'n alleenloper, maar hy het baie vriende gehad.)
'n Helikopter en vliegtuig is die lug in gestuur en reddingspanne het die digte bosse gefynkam.
Onder die vrywilligers was Ray Molina, een van die Amerikaner se beste vriende. Toe hy van True se verdwyning hoor het Molina dadelik in sy 1979 Mercedes gespring om met die soektog te help.
Micah True is beter bekend as Caballo Blanco (die Wit Perd). Hy was 'n bekende atleet – 'n ultra-hardloper wat oor berge gevlieg het en aan wedrenne deelgeneem het wat dubbel die afstand van 'n marathon was. Dit was niks vir True om die oggend wakker te word en 50 km te draf nie. Voor slaaptyd het hy gou weer 20 km om die blok gehardloop.
Maar mense het hom nie bewonder vir sy talent om lang afstande in die wildernis af te lê nie – dit was sy vermoë om te inspireer wat van hom 'n legende gemaak het.
True was 'n vrye siel wat van mieliemeel, boontjies en drome in die afgesonderde Copper-vallei in die noorde van Mexiko geleef het om naby die Tarahumara Indiane te wees.
Die Tarahumara-stam word beskou as die beste natuurlike hardlopers in die wêreld.
In kleurvolle bloese (ja, bloese), 'n lap om die heupe en sandale aan hul voete kan die Tarahumara soms soveel as 'n honderd kilometer 'n dag aflê. Die stam is menssku en leef in afsondering, maar die Indiane het Caballo Blanco verstaan. Die Wit Perd was een van hulle.
True se verhaal word breedvoerig vertel in die top-verkoper deur Christopher McDougall, Born to Run.
McDougall wou aanvanklik 'n boek oor vier ultra-atlete skryf, maar sy tyd in die Copper-vallei het 'n ander idee laat posvat.
Hier was 'n Amerikaner wat tussen die skaam Tarahumara Indiane gewoon het – 'n geheimsinnige alleenloper. En Micah True was boonop nie sy regte naam nie.
Die naam Micah is uit die Bybel geneem en True was die naam van sy getroue hondevriend van lank gelede, True Dog.
True is Michael Randall Hickmann gedoop. Sy familie was konserwatief en Rooms-Katoliek, maar hyself was 'n kind van die 70's. Sy lang, blonde hare het tot by sy skouers gehang en Ernest Hemingway en Franse filosofie was op sy boekrak.
As jong man het True 10 maande lank in 'n grot in Hawaii gewoon. Vir ekstra geld het hy begin boks en 'n los werkie hier en daar opgetel.
Hy het alleen deur Amerika geswerf en ‘n tyd lank in Boulder, Colorado, gewoon waar hy sy passie vir hardloop waarlik kon uitleef.
'n Paar jaar later het hy sy huis in die Copper-vallei gebou met klippe wat hy vanuit die rivier aangedra het.
True se lyk is drie dae nadat die soektog na hom begin het, deur Molina en twee ander vrywilligers langs 'n waterstroom gevind waar hy half agteroor gesit het met sy arms teen sy bors, een skoen uitgetrek en 'n waterbottel wat daar naby gelê het.
Sy dood was onverwags en hartseer, maar op 'n manier was dit ook volmaak. Want Micah True het gesterf terwyl hy deur 'n ongelooflike landskap beweeg het, terwyl sy vriende deur valleie, woude en strome gestap het en sy naam uitgeroep het.
Vir baie het hy die onbekende paaie verteenwoordig, die bergpadjies wat wegswenk van geld en ‘n alewige kyk na die horlosie.
Hier is wat Micah True ons kan leer: Vergeet vir ‘n oomblik van Zuma se Spear, Facebook-updates, die petrolprys wat jou doodwurg.
Draai ‘n bietjie van die hoofpad af en hardloop, hardloop vinnig. Dalk sien jy vir Micah True langs jou raak.
Bronne:
Born to Run – Christopher McDougall
The Michah True Story – Barry Bearak, NY Times
Stuur jou kommentaar aan Klubhuis
Neem kennis: Nuus24 is ten gunste van vryheid van spraak en 'n diversiteit van sienings. Die opinies van rubriekskrywers wat op Nuus24 gepubliseer word is hul eie, en verteenwoordig nie noodwendig die sienings van Nuus24 nie.
