Yslandse vulkaan nou gewild onder toeriste
2011-07-22 10:17
Eyjafjallajokull – Die Yslandse vulkaan wat verlede jaar chaos veroorsaak het
toe sy aswolke honderde vlugte op lughawens in Europa gestrand het, het nou ‘n
gewilde toeristebestemming geword.
“Mense is baie geïnteresseerd. Hulle wil in die krater van
die vulkaan staan wat veroorsaak het dat hulle hul vlugte gemis het,” het
Arsell Hauksson, ‘n kampeerterreinbestuurder aan die voet van die Eyjafjallajokull-berg,
laggend vertel.
Die kans om by een van Ysland se 130 aktiewe vulkane op te
klouter, is lank reeds vir dié land ‘n bron van inkomste met toeriste wat van
oral kom om dit te beleef. Die uitbarsting van die Eyjafjoell-vulkaan
verlede jaar het dié bedryf egter ‘n aansienlike hupstoot gegee.
“Ons ken almal iemand wat deur die chaos geraak is… Mense
gaan nog vir jare oor die uitbarsting praat,” het Hauksson gesê.
Alles was egter nie verlede jaar so rooskleurig toe dié
vulkaan ‘n wolk as sowat nege kilometer die lug in geblaas het nie.
Volgense Yslandse standaarde was Eyjafjoell se uitbarsting relatief klein. Die Grimsvoetn-vulkaan wat in Mei vanjaar uitgebars het, het meer
as in een dag uitgeblaas as wat Eyjafjoell in veertig dae uitgeblaas het.
Sterk winde het egter Eyjafjoell se as na Europa geblaas en
veroorsaak dat die kontinent se lugweë vir die eerste keer sedert die Tweede
Wêreldoorlog vir so ‘n lang tydperk gesluit moes word.
Dié uitbarsting het Ysland se toerisme verlede jaar ‘n groot
knou toegedien.
“Ek het die meeste besprekings ooit vir Mei verlede jaar
gehad … en niemand het opgedaag nie as gevolg van die as,” het Unnar
Gardarsson, Ice Safari se bestuurder gesê.
Sestien maande later fluit hy egter ‘n ander deuntjie op die
rant van Eyjafjoell se gloeiende krater, met toeriste wat nou hierheen stroom.
“Die uitbarsting het Ysland op die kaart gesit,” meen hy. “Eyjafjoell
was nog altyd baie mooi en nou is dit ook beroemd.”
– Volg Nuus24 op Twitter.
- AFP