Weskus-gasvryheid en blomme noodsaak besoek
2011-07-26 10:37
Vissersdorpies en die ongetemde, ruwe kuslyn lewer karaktervolle vissermanne met stories so groot soos die vis wat weggekom het, kreef, walvisse, bokkoms, watersport en avontuur.
Wyn en olywe, kuns en kultuur, 4x4- en staproetes lok baie toeriste en dan, natuurlik die blomme.
Die Weskus word in die vroeë lente al getooi met wit en geel madeliefies sowel as blou en pienk nemesias. Weggesteek tussen die groter plante, kruip ander juwele soos winecups, sparaxis, lachenalias en babnias weg.
In die Weskus Nasionale Park verwelkom plate blomme die besoeker, en die publiek kan die Postberg-reservaat tussen Augustus en September besoek.
Moet ook nie die Kaap Columbine-reservaat by Paternoster en die reservate by Darling, Hopefield, Clanwilliam en Vanrhynsdorp misloop nie.
Maak seker by die onderskeie streeksbeamptes waar daar blomreservate is.
Daar is ook belangrike veldblomskoue wat jy van Augustus tot September kan bywoon.
Hieronder tel die Vanrhynsdorp-vetplantskou, wat van 30 Julie tot 31 Augustus plaasvind, die Hopefield-fynbosskou van 25 tot 28 Augustus, die Clanwilliam-veldblomskou van 25 tot 31 Augustus, die Darling-veldblomskou van 16 tot 18 September en die Duckitt-orgideëskou van 15 tot 18 September.
Met die reënval wat tot laat Oktober kan strek, is kleurryke vygies, watsonias asook oranje en geel stinkkruid volop en kan die kus se blomtydperk selfs nog langer aanhou.
Langs die kus verskyn wolke pienk seelaventel asook rooi en oranje botterblomme, sowel as plakkie-blomme, in die middel van die somer.
In die winter blom die geel en oranje chasmanthes terwyl roomkleurige aronskelke die vleilande en paaie vul.
Die blomtapyt teen die Langebaan-strandmeer lok jaarliks duisende besoekers.
’’Daar is belangrike veldblomskoue wat jy van Augustus tot September kan bywoon.
– Volg Nuus24 op Twitter
- Beeld