Wes-Kaap vry na toeriste uit Bric-lande
2011-07-28 11:04
Kaapstad – Die Wes-Kaapse toerismebedryf voer groot planne in die mou om voelers uit te steek na nuwe markte, soos dié van die Bric-lande (Brasilië, Rusland, Indië en China) om die bedryf hier ’n hupstoot te gee.
Alan Winde, provinsiale minister van ekonomiese ontwikkeling en toerisme, het gister gesê die huidige insinking in die toerismebedryf is nie ongewoon nie.
Dít kom nadat die ANC in die provinsiale parlement die DA voor stok gekry het oor swak toerismesyfers.
Hotelle, restaurante en ander toeriste-instellings het reeds vir hoëvlak-ingryping deur die nasionale regering gevra.
Waar die Wes-Kaap voorheen die tweede meeste buitelandse besoekers gelok het, is dié provinsie nou in die vierde plek.
Lynne Brown, ANC-LPP, het gesê die DA moet volle verantwoordelikheid aanvaar vir die toerismekrisis en die duisende werksgeleenthede wat hierdeur in die Wes-Kaap verlore kan gaan.
“Die toerismebedryf kan nie wit en duur bly nie.”
Volgens Winde kan die insinking egter toegeskryf word aan die winterseisoen en die feit dat gasheerlande van internasionale geleenthede, soos verlede jaar se Wêreldbeker-sokkertoernooi, gewoonlik deur so ’n insinking ná die gebeurtenis gaan.
Hy het bygevoeg die feit dat tradisionele markte soos die VSA en Europa steeds steier onder die ergste resessie in 60jaar dra tot die insinking by.
Winde het gesê ofskoon die toeristesyfers laer is, is dié toeriste gewoonlik meer welaf, bestee hulle meer en bly hulle langer.
“Ons is besig om strategies en proaktief plaaslike toerisme, toerisme uit Afrika-markte, saketoerisme en nuwe markte te ontgin om die bedryf ’n hupstoot te gee.”
Volgens hom word Gautengers en inwoners van ander provinsies geteiken deur die Wes-Kaap te bemark as ’n waarde-vir-geld-bestemming.
“Ons moet ook ten volle gebruik maak van ons bande met die Bric-lande en gaan die Wes-Kaap in September by groot handelsekspo’s in Brasilië en Argentinië bemark.”
Syfers toon Chinese besoekers aan die Wes-Kaap het van sowat 26000 in 2009 tot sowat 41000 in 2010 toegeneem. Ook besoekers uit Indië en Brasilië het toegeneem.
Volg Nuus24 op Twitter.
- Die Burger