Wêreld se hoogste toring volbespreek

2012-05-24 12:00

Die Sky Tree in Tokio is amptelik die hoogste toring in die wêreld, maar is vir die volgende twee maande volbespreek.

Ten spyte van sterk winde en reën het die langverwagte Sky Tree Dinsdag geopen.

Maar vir besoekers wat die hoogste toring wil besoek is daar slegte nuus. Kaartjies om die twee uitkyk-dekke te besoek is tot in Julie uitverkoop.

Duisende mense het na die hoofstad gestroom en sommige besoekers het glo vir tot ‘n week in ‘n tou gestaan om Dinsdag by die toring in te gaan.

Diegene wat gelukkig genoeg was om in te kom, moes ongelukkig tevrede wees met swak sigbaarheid as gevolg van die weer.

Sterk winde het daartoe gelei dat twee hysbakke weens veiligheidsredes gesluit is en sommige van die besoekers is 30 minute lank op een van die uitkyk-dekke gestrand gelaat.

Dit het drie en ‘n half jaar geneem om die Sky Tree te voltooi en die toring is ontwerp om skuddings van aardbewings te weerstaan, maar is klaarblyklik nie so bestand teen die weer nie.

Die toring is twee keer die hoogte van die Eiffeltoring en word erken as die hoogste toring in die wêreld.

– Lees meer by Wanderlust

– Volg Nuus24 op Twitter