Vrou sterf op luukse toerskip
2011-11-23 15:34
Kaapstad – ‘n Amerikaanse toeris is op ‘n toerskip dood wat Woensdag by Rio de Janeiro se hawe aangekom het nadat 79 mense aan boord siek geword het as gevolg van ‘n vreemde siekte.
Die vrou is aan boord die MS Veendam, ‘n luukse skip wat aan die Amerikaanse maatskappy Holland America Line behoort, dood.
Die skip het van Valparaisa in Chili na Rio gevaar met 1 800 mense aan boord.
Die polisie wag nog vir ‘n verslag van forensiese dokters oor die vrou se dood en hulle kon nie haar identiteit bekendmaak nie.
Nietemin het die nuusagentskap Agencia Brasil berig dat daar geen aanduiding is dat haar dood verband hou met die siekte nie.
Die dokter wat aan boord die Veendam was, het glo gesê dit blyk of die vrou aan natuurlike oorsake dood is, het plaaslike polisie wat die saak ondersoek volgens die Agencia Brasil gesê.
Ronaldo Azaro, die sekretaris van toerisme vir Rio de Janeiro, het gesê Brasilië se nasionale gesondheidsagentskap (Anvisa) is in kennis gestel dat daar ‘n gesondheidskwessie aan boord die skip was toe dit Valparaiso verlaat en later in Uruguay gestop het.
Volgens Azaro het minstens 72 passasiers en sewe bemanningslede siek geword op die reis van Chili.
Nietemin het amptenare wat Woensdag in Rio op die skip gegaan het gevind dat slegs twee mense nog simptome van die siekte getoon het, het Azaro gesê.
– Volg Nuus24 op Twitter
- AFP