Vrou aangekeer ná bomdreigement op vlug

2011-07-28 22:01

Kaapstad - Owerhede het ‘n Kaliforniese vrou op die Philadelphia Internasionale Lughawe in hegtenis geneem nadat sy dreigement op ‘n vlug van Londen gemaak het.

Volgens WPVI-TV-berigte het die polisie Hanna Shiner Woensdagmiddag aangekeer.

Ondersoekende beamptes het gesê sy het bemanningslede en passasiers op die vlug gedreig en gesê sy gaan ‘n bom op die vliegtuig laat ontplof.

Die polisie kon nie sê hoekom sy die uitlatings gemaak het nie.

Shiner sal eersdaags in die hof in Philadelphia verskyn op onder meer ‘n aanklag van die maak van terroristiese dreigemente.

– Volg Nuus24 op Twitter.
 

- SAPA