Voëlkyk in Kwazulu-Natal
2010-05-04 10:32
Ek is saam met ’n groep voëlliefhebbers op ’n vyfdag-uitstappie op die Suidelike KZN-voëlkykroete. Dis nie ’n roete met ’n begin en einde nie, eerder ’n klomp voëlkykplekke waaruit jy vir jou ’n lekker vakansie kan aanmekaar slaan.
Party van hierdie plekke is net ’n voëlkykskuiling, ander ’n paadjie wat jy kan stap, terwyl party sommer net ’n plek langs die pad is waar jy dalk daardie skaars voëlsoort kan sien waarna jy nou al vyf jaar soek.
Soms is jy op ’n grasvlakte of op ’n plato, in ’n miswoud of selfs hoog bo in die Drakensberg.
Ek voel effens uit my plek, want ek weet net mooi niks van voëlkyk af nie. Die toerleier, Malcolm Gemmell, voorheen ’n boer van Creighton, stel my egter gou gerus. “Jy sal gou regkom. Dié deel van die wêreld is een van die beste plekke om te leer. Hier’s groot voëls, klein voëls, skaars voëls...”
Voëlkyk 101
Die Middelland
By die Beacon Vlei gasteplaas is daar twee verblyfopsies: The Manor House (B&B) en The Boat House (selfsorg). Daar is staproetes rondom die dam, waar jy ook kan vlieghengel of in ’n kano roei. Ongelukkig word dagbesoekers nie toegelaat nie. Oor naweke moet gaste vir minstens twee nagte oorbly.
Koste: The Manor House kos tussen R250 en R310 per volwassene en vir kinders is daar spesiale tariewe. In The Boat House kan vyf mense oorbly; dit kos tussen R590 en R900 per nag, afhangende van die aantal mense.
Kontak: 033 234 4486; www.beaconvlei.co.za
Marutswawoud
Hoe kom ek daar? As jy Bulwer met die R617 van Pietermaritzburg se kant af nader, volg net die padbordjies na die Marutswawoud.
Watter voëls kan ek sien? Die grootpapegaai, oranjelyster, rooibektiptol, bosloerie en groenkolpensie.
Koste: R20 vir volwassenes en R5 vir tieners en pensioentrekkers. Gooi asseblief iets in die hoflikheidsboksie as jy na-ure hier aankom. Simphiwe is ’n puik gids – dis ’n ekstra R20 p.p.
Kontak: John Brown (bestuurder) 072 372 1500; Simphiwe Dumakude (hoofgids) 073 543 8545.
Die Suidelike Middelland
Die beste voëlkykplekke in die suidelike Middelland is op plase. Jy kan dit net besoek met ’n gids (soos Malcolm) wat boere se toestemming het.
Watter voëls kan ek sien? Swartrugkwarteltjie, mahem, veldpou en die bedreigde blouswael, wat in leë erdvarkgate nesmaak. Hier is ook ’n paar broeiplekke van die suidelike kalkoenibis in die kloof van die Mzimkulurivier.
Koste: R150 per uur
Kontak: Button Birding 039 833 1029 www.buttonbirding.com
Kliek hier vir die res van hierdie roete.