Vlieëniers ‘weet nie meer hoe om te vlieg nie’
2011-10-20 08:57
Johannesburg - ’n Toenemende aantal vlieëniers “weet nie meer hoe om te vlieg nie” en baie is “verslaaf” aan outomatisasie.
Genl. Des Barker (afg.), bevoegdheid-areabestuurder by die Wetenskaplike Nywerheidsnavorsingsraad (WNNR), het gister tydens ’n veiligheidseminaar van die Burgerlugvaartowerheid (BLO) in Boksburg gesê vlieëniers maak al hoe meer staat op tegnologie.
“Mense is die swakste skakel in die lugvaartbedryf, maar vlieëniers vlieg self minder en minder en weet soms nie wat om te doen wanneer hulle in ’n noodsituasie is nie.”
Hy het verwys na ’n transkripsie van die gesprek tussen die twee vlieëniers van Air France vlug 447 wat in Junie 2009 tydens ’n vlug van Rio de Janeiro na Parys, Frankryk, in die Atlantiese Oseaan neergestort het.
Die 228 mense aan boord is almal in die ongeluk dood.
Volgens Barker kon die vlieëniers nie ’n enjinstaking korrigeer nadat die outomatiese vliegstelsel buite werking geraak het nie.
“Gevorderde tegnologie beteken meer vlieëniers maak gebruik van die outomatiese vliegstelsel in plaas daarvan om van die handleiding gebruik te maak.”
Barker het gesê outomatisering het lugvaart veiliger gemaak, maar dit is belangrik dat vlieëniers weet hoe om op te tree wanneer tegnologie buite werking raak.
Hy het gesê daar word beweer in die VSA “vlieg” sommige vlieëniers so min as drie minute per vlug.
“Hul fyn motoriese vaardighede verswak, want hulle gee die stuur van die vliegtuig oor aan die outomatiese vliegstelsel.
“Hulle verloor bewustheid van hul posisie.”
Barker het kapt. Chesley Sullenberger, ’n vlieënier van US Airways, aangehaal wat gesê het die lugvaartbedryf kan nie bekostig dat vlieëniers sowel as tegnologie gelyktydig onklaar raak nie.
Barker het gesê ’n verdere uitdaging vir lugvaart in Suid-Afrika is die vinnige vordering van tegnologie.
Obert Chakarisa, hoofbestuurder van vliegtuigveiligheid van die BLO, het gesê Suid-Afrika gaan binne die volgende tien jaar ’n ernstige tekort aan ingenieurspesialiste hê as daar nie nou opgetree word nie. “Verskillende soorte ingenieurs gaan benodig word in pas met die nuutste ontwikkelinge in lugvaart.”
Hy het gesê statistieke moet bestudeer en gebruik word om lugrampe te voorkom.
Volgens die BLO se statistieke was daar tot dusver vanjaar 85 vliegtuigongelukke en is 34 mense dood.
– Volg Nuus24 op Twitter
- Die Burger