Vlaag gewelddadige misdaad tref Goue Kus
2011-07-21 18:22
Brisbane – Die Goue Kus in Queensland, Australië, loop onder ‘n vlaag gewelddadige misdaad deur met nóg ‘n moord wat Woensdag hier gepleeg is.
Colin Lutherborrow (36) het in die vroeë oggendure die derde persoon geword wat die afgelope twee maande in altesaam vyf skietvoorvalle dood is.
Daar was ook in dié jaar reeds talle gewapende rooftogte in dié gewilde vakansiestad.
Volgens die president van die Queensland Polisie-unie, Ian Leavers, kan die toename in misdaad toegeskryf word aan die feit dat georganiseerde misdaad en onwettige motorfietsbendes toenemend ‘n houvas op die gebied gekry het.
Hy het bygevoeg dat polisiebeamptes reeds te veel werk het om genoegsame aandag aan die probleem te gee.
“Die Goue Kus het homself nou sonder twyfel as die misdaadhoofstad van Australië gevestig en indien ons nie vinnig 100 tot 150 bykomende polisiebeamptes aanstel nie, gaan ons in groot moeilikheid beland,” het Leavers gesê.
Anna Bligh, premier van Queensland, het gesê ‘n nuwe ernstige- en gewelddadige misdaadeenheid is reeds op die been gebring en sy is vol selfvertroue dat dit die probleem sal oplos.
“Die tipe voorvalle wat ons sien, is onaanvaarbaar vir ‘n stad soos die Goue Kus,” het sy gesê.
– Volg Nuus24 op Twitter.
- SAPA