Vierde dag van stakings by Franse lughawens

2012-02-09 18:08

Parys – Passasiers staar 'n vierde dag van kansellasies en vertragings by Franse lughawens in die gesig weens 'n staking oor arbeidsregte.

Air France het Donderdag bekendgemaak dat 35% van sy langafstandvlugte wêreldwyd en 25% van die lugredery se ander vlugte vir die dag gekanselleer is weens die staking deur loodse en ander personeellede.

Die meeste vlugte was by die Charles de Gaulle-lughawe in Parys gekanselleer.

Die vierdaagse staking gaan na verwagting voor Vrydag tot 'n einde kom, wanneer unies met die regering gaan vergader oor 'n dispuut dat werkers voortaan 48 uur voor die tyd moet kennis gee oor hul stakings.

Air France het sover $12.33 miljoen per dag verloor weens die staking.

– Volg Nuus24 op Twitter.

- AP