Vier 'n winter-Kersfees in Tulbach
2011-06-24 11:26
Tulbagh – Kersfees kom vroeg hierdie jaar in Tulbagh se winter-Kersfees, kompleet met flikkerende liggies, ‘n Kersvader en hopelik sneeu op die berge.
Die dorpie word op 25 en 26 Junie omskep in ‘n winter-wêreld wat herinner aan Kersfees in Europa.
Kersversierings word vroeg uit hul bokse gehaal om die strate te versier en Kersvader sal lekkers uitdeel aan die grootoog kinders in Kerkstraat.
Besoekers kan die verskeidenheid fotografie-uitstallings, kunsgalerye en oulike winkeltjies besoek en selfs solank geskenke begin koop om Desember se Kerskouse mee te vul.
Daar sal ‘n verskeidenheid kosse wees, met kaas, Belgiese sjokolade en olywe wat beloof om die mond te laat water.
Vir die kinders is daar talle aktiwiteite, soos ‘n springkasteel, ponieritte, gesigverf en heelwat meer.
Natuurlik sal ‘n besoek aan die Tulbagh-vallei nie afgerond wees sonder ‘n besoek aan ‘n paar wynplase in die streek nie.
Die “Rock with Santa”-partytjie Saterdagaand moet ook nie misgeloop word nie.
– Safarinow.com
– Volg Nuus24 op Twitter