Twee gedenkvaarte na Titanic se watergraf
2012-04-12 09:00
New York – Twee passasierskepe aan teenoorgestelde kante van die Atlantiese Oseaan is onderweg op ’n reis na die plek waar die Titanic 100 jaar gelede gesink het.
In die New Yorkse hawe het die passasierskip Azamara Journey Dinsdagaand met die vaart begin. Aan die ander kant van die oseaan het die MS Balmoral, bestuur deur Fred Olsen Cruise Lines, sy herdenkingsvaart Sondag uit Engeland begin.
Albei skepe was stampvol liefhebbers van die geskiedenis, talle geklee in kleredrag uit die era, insluitend ’n seuntjie met ’n vals wit baard wat geklee was soos die kaptein van die gedoemde skip 100 jaar gelede.
In April 1912 het die Titanic uit Southampton in Engeland na New York vertrek. Die vaartuig het ’n ysberg in die noordelike Atlantiese Oseaan getref en gesink. Meer as 1500 passasiers en bemanningslede het omgekom.
Die Azamara Journey, bestuur deur Azamara Club Cruises, het 440 passasiers aan boord en is onderweg na Halifax, in die Kanadese provinsie Nova Scotia, waar meer as 100 slagoffers van die Titanic begrawe is.
Daarna sal dit na die plek in die Atlantiese Oseaan vaar waar die Titanic gesink het vir ’n herdenkingsdiens. Onderweg daarheen sal passasiers luister na praatjies oor die lewe aan boord van die Titanic en ’n kostuumtema-aandete bywoon.
Kaartjiepryse vir dié vaart het in die afgelope weke afgeneem van byna $5000 (sowat R39 700) tot $1000 (R7 900) per persoon.
Aan die ander kant van die oseaan was die MS Balmoral op pad met 1 309 passasiers, insluitend familielede van sommige van die slagoffers van die tragedie. Die skip moes Maandag ’n wyle aandoen by die Ierse dorp Cobh weens ’n mediese noodgeval aan boord voordat die vaart na New York hervat is.
Minstens een mens aan boord van die Azamara Journey het ’n baie persoonlike verbintenis aan die tragedie van 100 jaar gelede.
Sharon Lee Willing van Tucson, in die deelstaat Arizona, het ’n kaartjie gekoop om haar oupagrootjie, Herbert Chaffee, te huldig. Chaffee was ’n plaasmagnaat van Noord-Dakota wat in die ramp omgekom het. Volgens die familie se kennis was Chaffee en sy vrou in Europa op hul tweede wittebrood.
“Ek weet dit gaan net soos water lyk daar, maar om te dink aan daardie groot skip wat daar gesink het,” het Willing gesê. “Dit gaan nogals moeilik wees, dink ek.”
Willing se oumagrootjie, Carrie Chaffee, is op die laaste reddingsboot geplaas wat dit veilig van die skip af gemaak het.
– Die Burger.
- Sapa - AP
