Tulbagh vereer sy kunsmeesters op fees
2011-08-29 08:36
Tulbagh.– Die Lentekunsfees wat die naweek hier gehou is, het die dorp se kunsmeesters van die verlede, hede en toekoms vereer.
Werke van wyle Christo Coetzee, Vasek Matousek en Jan du Toit is prominent in die dorp vertoon.
Musiek, kos en wyn het verskeie ander kunsuitstallings aangevul. Mense kon ook leer kaas en sjokolade maak.
Een van die gewildste byeenkomste was die kuns- en oudhede-veiling wat Saterdagoggend by Manley Wine Lodge deur Carl Stassen Afslaers van Ceres aangebied is.
Twee kunswerke (gemengde medium op papier) van Christo Coetzee (1924-2000) getiteld Beaty is the Beast en Head Violet het vir onderskeidelik R8 000 en R7 000 verkoop. Coetzee se ateljee waar hy in Van der Stelstraat gewerk het, is pas as museum en galery oopgemaak. Die vloer waarop hy gewerk het, met interessante verfspatsels, is pragtig bewaar, asook sy tafel en ’n aantal kwasse.
’n Olieverfwerk van Tinus de Jongh het R12000 gehaal.
’n Volledige Susie Cooper-eetstel is vir ’n weggeeprys van R600 opgeveil.
Nog ’n interessante artikel was ’n klein borsbeeld uit klip wat Coert Steynberg van pres. J.G. Strydom gemaak het, wat vir R2 000 opgeveil is.
’n Bottel 1939 KWV Port is vir R275 verkoop en ’n KWV Roodeberg Millennium (stel van vier) vir R2 000.
Ander gewilde artikels was stinkhout- en mahonie-meubels
– Volg Nuus24 op Twitter
- Die Burger