Township-toerisme blom weer ná Dewani-moord
2011-01-21 11:38
Kaapstad – Die uitleweringsverhoor van die Britse toeris Shrien Dewani, wat van die moord op sy vrou Anni in Kaapstad beskuldig word, se uitleweringsverhoor het Donderdag 20 Januarie begin.
As gevolg van Dewani se swak gesondheid is die saak tot 8 Februarie 2011 uitgestel.
Ná die tragedie verlede jaar, het Kaapstad Toerisme ‘n afname in besprekings en talle kansellasies van kulturele-toere en township-toere ondervind as gevolg van vrese oor veiligheid.
Nietemin is alle aanduidings daar dat die township-toer-industrie weer na normaal teruggekeer het.
Mariëtte Du Toit-Helmbold, hoof van Kaapstad Toerisme, meen dat sterk gemeenskap-leierskap en konsekwente en positiewe boodskappe deur die toerisme-industrie ‘n groot bydraende faktor was tot die vinnige herstel van die sektor.
“Kaapstad Toerisme het ‘n vraag oor die veiligheid van hul besoekers en die impak van Anni Dewani se moord op hul industrie-opname geplaas wat in Desember gedoen is.
“Talle toeroperateurs wat township-toere doen het kansellasies gerapporteer en talle het gesê dat daar ‘n toename was in vrae oor die veiligheid van toeriste,” het Du Toit-Helmbond gesê.
“Ons het Donderdag weer toeroperateurs gekontak wat spesialiseer in township-toere en ons is bly om te sê dat, ná die oorspronklike effek van die Dewani-tragedie, daar nog geen nuwe kansellasies van township-toere was nie.
“Dit dui op ‘n meer robuuste mark – en verseker ook ‘n meer ingeligte kulturele toerisme verbruiker – as wat ons oorspronklik verwag het.”
Volg Nuus24 op Twitter