Toeristegetalle in Londen neem af
2012-08-02 13:36
Londen – Waarskuwings oor verkeerschaos en peperduur hotelkamers in Londen skrik glo toeriste af.
Verskeie ondernemings kla dat hulle nie geld maak nie omdat al die toeriste reguit na die Spele haas en die stad se ander toeriste-aantreklikhede heeltemal vermy.
Toeriste is in aanloop tot die Olimpiese Spele gewaarsku om die middestad te vermy omdat duisende atlete, afrigters, media en toeskouers na die stad sal stroom.
Die Spele word al lank geoormerk as ‘n hupstoot vir die Britse ekonomie, wat swaar getref was deur die ressesie, maar toeristegetalle het drasties afgeneem sedert die begin van die Spele.
“Londen het daagliks sowat 300 000 buitelandse en 800 000 plaaslike besoekers. Dié mense is almal gewaarsku dat hulle moet wegbly en dit is presies wat hulle gedoen het,” het Tom Jenkins, uitvoerende hoof van die Europese toeroperateursvereniging (ETOA), gesê.
Jenkins meen baie toeriste het slegs die raad van die Transport for London, wat die hoofstad se paaie en spoorweë beheer, gevolg.
“Die syfers is aansienlik minder as verlede jaar. Hoe ver die syfers nog gaan daal, sal net bepaal word deur hoe Transport for London hierop gaan reageer.”
“Tog moet mens in gedagte hou dat baie van die toeskouers nie hier is om inkopies te doen of die toeriste-aantreklikhede te kom besoek nie,” het Jenkins bygevoeg.
Steve McNamara, algemene sekretaris vir die gelisiensieërde taxibestuurdersvereniging, sê ook dat hul besigheid met sowat 20% tot 40% afgeneem het.
“Ek weet nie waar al die toeriste is of wat hulle doen nie, maar Londen is soos ‘n spookdorp.”
Die Britse regering hoop om meer as $1,54 miljard (sowat R12 miljard) tydens die Spele te maak. Dit het die land sowat R120 miljard gekos om die Spele aan te bied.
– Volg Nuus24 op Twitter
- Sapa - AFP
