15% meer toeriste in SA in 2010
2011-09-27 12:18
Kaapstad. – Suid-Afrika het verlede jaar ’n “uitsonderlike” toename van 15,1% in toeriste-getalle na die land gesien, het Marthinus van Schalkwyk, minister van toerisme, gesê.
Hy het in antwoord op ’n vraag in die parlement gesê meer as 8 miljoen toeriste het die land in 2010 besoek in vergelyking met net meer as 7 miljoen in 2009.
Van Schalkwyk het gesê dié syfer vergelyk gunstig met internasionale syfers.
“Syfers van die Verenigde Nasies se Wêreldtoerisme-organisasie toon toerisme-aankomste het in 2010 wêreldwyd na raming met 6,7% toegeneem, wat beteken Suid-Afrika oortref internasionale markte met 8%.”
Die toename van 15,1% in toeristegetalle na Suid-Afrika was beter as dié van alle ander wêreldstreke, soos onder meer die Midde-Ooste (13,9%), Asië en die Stille Oseaan-eilande (12,6%), die Amerikas (7,7%), die res van Afrika (6,4%) en Europa (3,2%).
Dié toename was nie bloot aan die Wêreldbeker-sokkertoernooi te danke nie.
Syfers dui daarop dat toeristegetalle verlede jaar deur die jaar beter was as in 2009.
Van Schalkwyk het gesê die syfers toon ’n toename van 109,2% uit Sentraal- en Suid-Amerika, 39,1% uit Asië, 26,3% uit Australasië, 22,5% uit Noord-Amerika, 19,3% uit die Midde-Ooste, 12,8% uit die res van Afrika en 8,1% uit Europa.
"Dié syfers verskaf ’n betroubare basis waarop ons groeiteikens vir ontluikende markte kan bou."
“Uit ’n toerisme-oogpunt kan ons aansienlik voordeel trek uit Suid-Afrika se insluiting by die Bric-vennootskap,” het Van Schalkwyk gesê.
“Ons doen ons beplanning en strategieë in ooreenstemming daarmee.”
Die ministerie se reise in die vorige boekjaar – wat die minister, adjunkminister en amptenare insluit – het belastingbetalers R13,9miljoen uit die sak gejaag.
Die minister het 18 en die adjunkminister het tien internasionale reise onderneem.
Hulle het elkeen ook onderskeidelik op 52 en 85 binnelandse reise gegaan.
– Volg Nuus24 op Twitter.
- Die Burger