Toeriste lewend begrawe deur sneeustortings
2012-02-20 09:01
Seattle – Twee sneeustortings by twee verskillende vakansie-oorde in die Amerikaanse staat Washington het Sondag die lewe van vier toeriste geëis, het die San Francisco Chronicle berig.
Een sneeustorting het drie skiërs by die Stevens Pass-oord in die Cascade-berge lewend begrawe, en 'n ander het 'n sneeuplankryer van 'n krans in Snoqualmie afgevee.
Al vier die slagoffers was in dele van die oorde waar besoekers nie toegelaat word nie.
'n Sneeuplankryer het vroegmiddag saam met twee vriende in Alpental, een van vier dele van die Summit at Snoqualmie-oord, met sy sneeuplank gery toe hy 'n sneeustorting veroorsaak het wat hom van 'n krans afgevee het, het owerhede gesê.
Altesaam 12 skiërs is enkele minute later by die Stevens Pass-oord deur 'n sneeustorting begrawe. Drie van hulle kon nie weer bygebring word nie en is dood, het Katie Larson, 'n woordvoerder vir die King County-polisiedepartement, gesê.
– Lees hier meer.
– Volg Nuus24 op Twitter.