Toeriste in hospitaal oor chloor in swembad
2012-02-20 13:45
Phoeket – Meer as 30 mense, onder wie toeriste, is die afgelope naweek op die Thaise eiland Phoeket na ‘n hospitaal geneem ná 'n chloorlekkasie in ‘n hotelswembad, het plaaslike amptenare gesê.
Die voorval het kort ná 10:00 by die Phuket Orchid-oord-en-spa-hotel by Karon-strand plaasgevind, het die hoof-ondersoekbeampte, lt.kol. Chavalit Pethsripia gesê.
Volgens Pethsripia het meer as 30 mense ligte beserings opgedoen nadat hulle blootgestel is aan ‘n ongesonde hoë vlak van chloor in die swembad.
Die lekkasie het velirritasies en seer oë veroorsaak, het Phumin Silapan, die direkteur van die plaaslike Patong-hospitaal, gesê.
“Daar is 37 mense gehospitaliseer, insluitende 26 buitelanders,” het hy aan AFP gesê.
Hy het bygevoeg dat 12 mense reeds ontslaan is, terwyl 25 na ‘n groter hospitaal oorgeplaas is.
Een van die mense wat na die ander hospitaal geneem is, was ‘n swanger toeris wat asemhalingsprobleme ondervind nadat sy die chemikalieë ingeasem het.
Onder die toeriste was 10 Noorweërs en nege Swede. Vyf Swede, waarvan een in 'n ernstige toestand is, is steeds in die hospitaal, het die land se ministerie van buitelandse sake gesê.
Noorweë se ministerie van buitelandse sake het gesê al sy burgers het reeds of is in die proses om die hospitaal te verlaat.
– Volg Nuus24 op Twitter
- AFP