Toerisme moontlik Haïti se redding
2011-12-06 15:27
Caracas – Twee jaar nadat ‘n aardbewing Haïti byna verwoes het, het sy president, Michel Martelly, gesê die sleutel vir die land se ekonomiese toekoms lê daarin om die land se toerismebedryf weer aan te wakker.
“Ons wil nie meer aalmoese ontvang nie, ons wil Haïti bemark,” het Martelly oor die naweek aan AFP gesê.
Martelly, wat sê Haïti moet nie meer net verbind word met “armoede en hartseer” nie, het gesê hy beplan om die land as ‘n vakansiebestemming te bemark.
“Ons wil die ander kant van Haïti wys wat nog nooit van tevore aan die wêreld gewys is nie,” het die president gesê.
Hy het bygevoeg dat sodra moontlike beleggers bewus gemaak word van die land se potensiaal, hulle gemaklik genoeg sal voel om “na Haïti te kom en Haïti weer te herbou.”
Hy is van mening dat vakansiegangers wat na Haïti se buurland, die Dominikaanse Republiek, stroom, net die hupstootjie kan gee wat die land nodig het om uit sy nood te kom.
“Toerisme is ‘n bedryf wat baie geld kan inbring en ons het baie om vir die wêreld te wys,” het hy gesê.
“Ons het ‘n baie ryk en diverse kultuur, ons het pragtige besienswaardighede, ‘n geskiedkundige verlede. Ons het die mooiste kus,” het hy gesê.
Martelly het bygevoeg dat hierdie nuwe fokus op toerisme in sy opinie die beste manier is om te verseker Haïti breek sy afhanklikheid van buitelandse hulp en bystand.
– Volg Nuus24 op Twitter
- AFP