Toerisme in SA sukkel, sê kenners
2011-07-20 12:06
Johannesburg – 'n Gebrek aan aanvraag, die sterk rand en stygende brandstofpryse is besig om die toerismebedryf in Suid-Afrika onder druk te plaas, toon 'n toerismebedryfindeks wat Woensdag vrygestel is.
"Sake in die reis- en toerismesektor was in die tweede kwartaal van 2011 steeds onder erge druk," het die toerisme-sakeraad van Suid-Afrika (TBCSA) gesê oor data in die TBCSA FNB-toerismebedryfindeks.
Dié indeks het in die tweede kwartaal van 2011 op 74.5 (uit 'n moontlike 100 punte) te staan gekom.
"Wanneer dit vergelyk word met die verwagte indeks van 94.1 vir die tweede kwartaal, het die bedryf aansienlik slegter gevaar as wat verwag is, en dit het ietwat slegter vertoon as die eerste kwartaal."
Die indeks gee 'n aanduiding van die huidige en verwagte toekomstige stand van verskeie ondernemings in die Suid-Afrikaanse toerismebedryf.
"Die jongste TBI-uitslae is beslis 'n bevestiging van wat ons op voetsoolvlak sien," het Mmatsatsi Marobe, uitvoerende hoof van die TBCSA, gesê.
Die toerismebedryf kry onder andere swaar as gevolg van 'n gebrek aan oorsese besoekers, te min plaaslike aanvraag in die ontspannings- en sakesektor, die sterk rand, stygende insetkoste en hoë brandstofpryse.
– Volg Nuus24 op Twitter.
- SAPA