Toeris voorgekeer vir té kort rokkie
2011-06-15 15:25
New York – ‘n Vroulike toeris wat op ‘n fiets gery het beweer sy is deur ‘n polisiebeampte in New York afgetrek omdat haar rokkie glo so kort was “dat dit ‘n ongeluk kon veroorsaak”.
Die Nederlandse toeris, Jasmijn Rijcken, het vertel hoe geskok sy was toe die voorval op ‘n warm, sonnige dag verlede maand plaasgevind het, het die Daily Mail berig.
Sy het ‘n kort rompie en stewels aangehad, maar volgens die New York-polisiebeampte het sy té veel been gewys.
“Hy het gesê dat dit die motorbestuurders se aandag aftrek en dat dit gevaarlik is,” het Rijcken gesê.
“Ek het gedink hy grap, maar hy het kwaad geword en vir my identiteitsdokument gevra.”
Sy is nie vir die voorval beboet nie.
- Daily Mail
Volg Nuus24 op Twitter