Thailand se toerisme trek swaar tydens vloede
2011-10-27 08:03
Bangkok – Thailand se vloedkrisis is besig om sy tol te eis op die land se winsgewende toerismebedryf, met potensiële vakansiegangers wat deur die oorstromings afgeskrik word.
Nietemin is meeste van die gewilde toeristebestemmings nie deur die vloede geraak nie.
Sedert die moesonreën drie maande gelede begin het, het beelde van oorstroomde huise en vreesbevange inwoners wat deur oorstroomde strate loop regoor die wêreld verskyn en het dit skade aan die land se beeld aangerig.
Talle toeriste het al hul vakansies na Thailand gekanselleer, het groepe in die bedryf gesê. Die terugslag volg kort ná die twee maande lange politieke onluste wat die land verlede jaar geruk het.
Die Association of Thai Travel Agents (ATTA) sê nuwe besprekings het met tot 70% gedaal in vergelyking met die gewone vlakke vir die maand, terwyl die adjunkhoof van die Tourism Authority of Thailand, Sansern Ngaorungso, gesê het hulle het 25% kansellasies ervaar.
“Al hoe meer mense kanselleer,” het hy gesê.
Meer as 300 mense is al in die vloede dood en miljoene mense, meestal in die noorde en in sentraal-Thailand, is daardeur geraak.
Die hoof-toerismebestemmings, soos Phuket, Samui en Phi Phi in die suide, is sover onaangeraak deur die oorstromings.
– Volg Nuus24 op Twitter
- AFP