Thailand: Video oor verkragting skrik toeriste af

2012-11-09 11:31

Bangkok – Talle mense het hul verblyf by hotelle in Thailand se Krabi-strandoord gekanselleer ná ‘n video gepubliseer is van ‘n Nederlandse man wat protes aanteken teen sy dogter se beweerde aanranding en verkragting in dié oord.

Die “Evil Man from Krabi”-video, wat op 23 Oktober op YouTube gelaai is, wys ‘n man met ‘n geweer wat sing oor die beweerde verkragting van sy 19-jarige dogter in Julie.

‘n Thaise toergids is vroeër in verband met die misdaad in hegtenis geneem, en het erken dat hy by die voorval betrokke was. Hy het egter later sy bekentenis teruggetrek en is op borgtog vrygelaat.

Sy vrylating het die Nederlandse pa genoop om die video te publiseer.

Die video is teen Vrydag al meer as 140 000 keer gekyk, en is volgens berigte besig om 'n uitwerking op die toerismebedryf in Krabi te hê.

“Ons kry die afgelope tyd baie kansellasies, veral by ons groot hotelle,” het Ittirit Kinglek, president van die Krabi-toerismevereniging, gesê.

“Die meeste van die kansellasies kom van Britse toeriste.”

– Volg Nuus24 op Twitter
 

- Sapa-DPA