Te veel toeriste by Sossusvlei wek kommer
2011-06-02 11:00
Windhoek – Daar is aanhoudende toerisme-aktiwiteit in die Sossusvlei-omgewing van die Namibiese Naukluft Nasionale Park en dit grens op onverantwoordelike toerisme, meen Ben Beytel, uittredende direkteur van parke en wildlewe-bestuur in die departement van omgewingsake en toerisme.
Wat veral van kommer is, is die swaar verkeer op die paaie in die park en die opskiet van lodges.
“Ons het onbeheerde toerisme, mense kom bou net lodges. Die gevolg is dat hulle dink dit sal ‘n winsgewende besigheid wees. Dit is nie altyd winsgewend nie en lei net tot onnodige kompetisie tussen die verskillende lodges,” het hy gesê.
Daar is sowat 600 lodges rondom Sossusvlei, wat almal van die vlei gebruik maak.
“In ons parke kyk ons uit na die kapasiteit van toerisme wat ons kan dra. Jy kan nie massa-toerisme hê nie, dit beïnvloed mense se ervaring wanneer hulle die parke besoek, want daar is dan te veel voertuie,” het Beytel gesê.
Sossusvlei is ‘n sout- en kleipan wat deur hoë rooi duine omring word en is in die suidelike deel van die Namib-woestyn geleë.
Gedurende besonderse reënerige seisoene kan Sossusvlei opvul met water en gevolglik stroom Namibiërs soontoe om dié gesig te aanskou. Ander tye is dit droog.
Té veel toeriste besoek die omgewing, terwyl die paaie nie behoorlik in stand gehou kan word nie.
Gevolglik kry toeriste ook nie die wilderniservaring nie, as gevolg van die konstante vloei van motors op die pad en dit raak op die uiteinde die wildlewe ook.
Daar word berig dat minstens 400 toeriste die omgewing daagliks besoek.
Lees meer by New Era