Talle SA'ners besoek NS vir rugby
2011-09-13 15:48
Kaapstad – Reisagente oor die land heen is tevrede met die verkope van Wêreldbeker-rugbypakkette, ondanks ‘n afname in die afgelope twee maande.
Indo Jet Sports, een van die amptelike Suid-Afrikaanse agente vir die internasionale rugby-skouspel, het tot dusver 530 pakkette verkoop, tesame met 1 600 wedstrydkaartjies.
“Verkope was goed. Ons het altyd gedink dit gaan moeilik wees om te verkoop as gevolg van die hoë koste van vlugte en akkommodasie,” het Mandi Zietsman, algemene bestuurder van die maatskappy, gesê.
“Ons het ons bedeling van pakkette verkoop en meer. Ons is tevrede daarmee. Verkope is effens beter as vir die Wêreldbeker-rugbytoernooi van 2003 in Australië,” het sy gesê.
Sy het bygevoeg dat hul mees suksesvolle Wêreldbekertoernooi in terme van verkope steeds die 1999 Wêreldbeker in Wallis was, waar die Springbokke derde geëindig het.
“In Wallis het ons 2 000 passasiers gehad en toe in 2007 (Frankryk) het ons 1 350 passasiers gehad,” het sy gesê.
Indo Jet Sports spesialiseer in plaaslike en internasionale rugbytoere en bied verskeie pakkette vir die Wêreldbeker-rugbytoernooi in Nieu-Seeland.
– Lees meer by iol
– Volg Nuus24 op Twitter