Tafelberg soek 30 miljoen stemme
2011-01-21 12:48
Die Burger
Kaapstad - Dertig miljoen stemme. Dít is hoeveel Tafelberg nodig het om as een van die wêreld se sewe nuwe natuurwonders aangewys te word.
Só het Fiona Furey, nuut aangestelde programbestuurder van die New7Wonders-veldtog in Suid-Afrika, Donderdag aan Die Burger gesê.
Afrika se hoop is gevestig op Tafelberg en Kilimandjaro, die enigste twee finaliste uit die vasteland.
Tafelberg ding mee met ander natuurwonders soos die Amasone-woud, die Dooie See, die Galapagos-eilande, die Groot Koraalrif in Australië en die Maldives.
“Tafelberg is tans onder die laaste 14 van 28 benoemde natuurwonders.”
Die organiseerders wil nie bekend maak hoeveel stemme Tafelberg reeds het nie.
Furey het Maandag as die projekbestuurder begin en gesê sy het baie planne om mense meer opgewonde te maak oor die veldtog en om hulle aan te spoor om vir Tafelberg te stem.
“Die meeste stemme wat Tafelberg tot dusver gekry het, was uit die buiteland.”
Planne om Tafelberg meer aktief op Facebook en Twitter te bemark, is reeds begin.
Lesers kan op dié twee sosiale netwerke gaan soek vir Tafelberg en so op die hoogte bly van die kompetisie.
“Ons wil later skole betrokke kry en nog ambassadeurs aanstel om meer fokus op die berg te plaas.”
Furey het verder gesê almal wat stem, moet minstens tien vriende aanmoedig om ook te stem.
“Ons kan nog die mylpaal haal, maar mense moet nou begin stem.”
Die New7Wonders-kompetisie is in 2008 begin en die groot dag wanneer die sewe nuwe natuurwonders aangekondig word is op 11 November.
Ondersteuners kan op drie maniere vir Tafelberg stem.
SMS die woord “Tafel” na 34874 om te verseker dat Tafelberg ’n kans het. Stemme kan in vyf tale (Afrikaans, Engels, Xhosa, Zoeloe en Sotho) gestuur word. Dit kos R2 per SMS;
Besoek die webtuistes www.New7Wonders.com of www.votefortablemountain.com
Volg vote4tablemount op Twitter
Volg die Vote for Table Mountain-bladsy op Facebook.