Tafelberg haal nie voorlopige top-tien
2011-11-07 07:01
Kaapstad - Met net vier dae oor moet mense vinnig begin wikkel as hulle wil hê Tafelberg moet as een van die Nuwe Sewe Natuurwonders gekies word.
Dit kom nadat Tafelberg nie gister onder die top-tien voorlopers in die kompetisie aangekondig is nie.
Die stigting van die veldtog van die Nuwe Sewe Natuurwonders het Sondag in ’n verklaring die top-tien voorlopers bekend gemaak.
Sabine Lehman, woordvoerder van die Tafelberg-sweefspoormaatskappy, het gesê hulle is teleurgesteld dat Tafelberg nie onder die voorlopers is nie, maar dit moet nie mense ontmoedig om te stem nie.
“Mense moet juis nou woeker en vinnig en baie stem!”
Eamonn Fitzgerald, woordvoerder van die stigting, het in ’n verklaring gesê daar is nog baie plek vir verandering en mense moenie hierdie top-tien lys as finaal aanvaar nie.
“Met miljoene stemme wat nog ontvang gaan word, kan finaliste wat nie in die top-tien is nie, dit moontlik nog maak.”
Bernard Weber, president en stigter van die veldtog, het gesê dit is baie interessant dat die Oosterse finaliste die meeste ondersteuning kry.
“Ek weet ook dat dit kan verander in die laaste paar dae voordat die wenners aangekondig word.”
Weber het verlede Donderdag Tafelberg besoek en gesê die berg is nie net ’n natuurwonder in die stad se agterplaas nie, maar ook ’n ontwerpelement van die natuur. Tafelberg is die enigste Suid-Afrikaanse natuurwonder onder die 28 finaliste.
Jean-Pierre de la Fuente, direkteur van dié veldtog, het verlede week gesê Tafelberg het nog baie stemme nodig.
Die eerste telling wat die voorlopige resultate wys, sal Vrydag om 21:07 op www.new7wonders.com aangekondig word.
Stem deur die woord “table” na 34874 te SMS. Dit kos R2 per SMS. Of stem deur www.new7wonders.com te besoek.
– Volg Nuus24 op Twitter
- Die Burger