Stygende kostes pootjie toerismebedryf

2011-04-05 12:04

Kaapstad – Brandstof- en elektrisiteitspryse is besig om aansienlik in Suid-Afrika te styg en plaas gevolglik groot druk op die toerismebedryf.

Dié bedryf sukkel reeds as gevolg van die sterk Rand.

Petrolpryse het vir ses agtereenvolgende maande met byna 17% altesaam gestyg.

Op 6 April sal die petrolprys weer met 54 sent ‘n liter styg.

Eskom het ook op 1 April die elektrisiteitspryse met 25,8% opgestoot.

Buiten hierdie verhogings het die Suid-Afrikaanse regering ook aangekondig dat hy ‘n nuwe koolstof-belasting oorweeg.

Toeroperateurs in Suid-Afrika sukkel om hierdie toenemende kostes te bestuur en het in die afgelope paar maande groot afnames in hul winsmarges gesien.

Volgens Martin Wiest, uitvoerende hoof van Tourvest Inbound Operations, word die meerderheid van hul pryse 18 maande vooruit uitgewerk, wat dit onmoontlik maak om enige kostes aan die verbruiker oor te dra.

“As gevolg van die huidige druk in die mark, is die winsmarges ook kleiner.”

Die Suid-Afrikaanse toerismebedryf wil dit verhoed om stygende petrolpryse by die pryse van hul pakkette te voeg en dink aan ander maniere om die stygende kostes te dek.

Lees hier meer.