Stapper wat Ben Nevis probeer klim, sterf

2011-05-31 16:00

Skotland – Polisie het Maandagaand probeer om in verbinding te tree met die familie van ‘n Franse stapper wat glo aan hipotermie gesterf het op die Ben Nevis-toeristepad.

Die man, wat in sy vroeë twintigs was, het Sondag saam met ‘n vriend probeer om die bopunt van Brittanje se hoogste berg te bereik.

Polisie in Fort William is kort ná 19:30 in kennis gestel dat die stapper in die moeilikheid was nadat hy siek geword het.

Ten tyde van die voorval was die twee stappers op ‘n hoogte van 853 m van die 1 344 m hoë berg by Carn Mor Dearg.

Twee reddingspanne van Lochaber en RAF Kinloss is uitgestuur, sowel as ‘n reddingshelikopter.

Die man het aan hipotermie gely en reddingswerkers moes hom op ‘n draagbaar dra tot waar die reddingshelikopter hom van die berg kon aflig.

Hy is na die Belford-hospitaal in Fort William geneem, waar hy om 23:15 dood verklaar is.

Kliek hier om meer te lees.