Slimfoon-programme vir gereelde reisigers
2011-02-11 16:36
Die wêreld van reis en tegnologie is besig om al hoe meer inmekaar te vloei en nou is daar slimfoon-programme wat vir reisigers beter beheer oor hul besige skedules kan bied.
Hierdie programme help reisigers om tyd te spaar wanneer hulle vakansies bespreek, hou hulle ingelig oor die status van vlugte, verskaf internet-toegang terwyl hulle op reis is en voorsien hulle met gedetailleerde padkaarte en inligting oor die weer.
Hier is ‘n lys van vier programme wat gemik is op diegene wat gereeld vir besigheid moet reis:
Tripit: ‘n Interaktiewe program wat verseker dat jou reisinligting nooit ver van jou vingerpunte is nie.
Epos jou besonderhede na Tripit en dit sal ‘n gedetailleerde reisplan (kaarte, weer, foto’s) vir jou skep.
Tripit help jou ook om jou kalender vinnig te verander en is die ideale rigtingaanwyser.
AllSubway HD: Hierdie program bevat 115 moltrein-kaarte van stede regoor die wêreld
AllSubway verskaf gedetailleerde kaarte wat die gebruiker kan vergroot, maar alhoewel dit ‘n gerieflike navigasie-middel is, is dit nie interaktief nie.
FlightTrack: Groet solank jou reisagent; hierdie is gemaak vir diegene wat gereeld vir besigheid moet reis.
Hier kan jy inligting kry oor vlugte by meer as 4 000 lughawens en van 1 400 lugrederye.
FlightTrack verskaf alternatiewe roetes, opgedateerde vertrek- en aankomstye sowel as ‘n kaart van die roete wat die vlug sal neem.
Boingo: Hierdie is ‘n diensverskaffer-program wat onbeperkte draadlose internet by geselekteerde lughawens, hotelle, restaurante, koffiewinkels en ander plekke in meer as 200 000 gewilde bestemmings wêreldwyd bied.
- Reuters