Seun vas vir moord op Britse toeriste
2011-04-18 13:55
Florida – ‘n Sestienjarige seun is in hegtenis geneem vir die vermeende moord op twee Britse toeriste in Florida.
James Kouzaris, 24 en James Cooper, 25, was saam met familie en vriende op vakansie in Sarasota.
Hul lyke is vol koeëls in ‘n afgeleë woonbuurt, wat bekend is vir bendegeweld, gevind.
“Dit is ongewoon want dit is ‘n woonbuurt, daar was geen ondernemings wat oop was nie en hulle was in die omgewing net voor 03:00 in die oggend,” het polisiekaptein Paul Sutton aan AFP gesê.
Die mans was op ‘n familievakansie en het in Longboat Key, ‘n nabygeleë vakansieoord, gebly,” het hy bygevoeg.
“Een van die slagoffers se ouers het saam met hulle gereis. Dit is ‘n verskriklike voorval.”
Die twee mans, wat beide gegradueerdes van die Universiteit van Sheffield was, het nie ‘n motor gehad nie.
Die motief vir die moorde is nog nie vasgestel nie, alhoewel die polisie vermoed dat dit ‘n straatroof kon wees, of ‘n moontlike dwelmooreenkoms wat skeefgeloop het.
Die polisie het bevestig dat nie een van die mans in besit van dwelms was nie, maar hulle wou nie bevestig of hulle geld of wapens gehad het nie.
- Breaking Travel News