Selfoonwebwerwe belangrik vir reisigers
2011-08-29 09:21
Kaapstad – Ondernemings in die toerismebedryf sal in die toekoms baie meer op hul selfoonwebwerwe moet fokus.
Dít is die siening van Damian Cook, stigter en uitvoerende direkteur van E-Tourism Frontiers, ‘n inisiatief wat daarop gemik is om aanlyn-toerisme in opkomende markte te ontwikkel.
“Mense reis met hul slimfone en gebruik dienste wat op spesifieke liggings gebaseer is om hotelle via selfoonprogramme te bespreek,” het Cook gesê.
Cook meen dit is noodsaaklik vir ondernemings om ‘n selfoonwebwerf te hê en om op Facebook Places gelys te wees.
Laasgenoemde stel Facebook-gebruikers in staat om hul huidige bestemming deur hul selfoon bekend te maak.
Dit is ook belangrik dat toerisme-ondernemings Tripadvisor tot sy volle potensiaal gebruik.
“Dit is skokkend dat slegs 4% van reismaatskappye hul profiele op Tripadvisor aktief bestuur.
“As hulle registreer kan hulle inhoud en videos oplaai, terugvoer lewer en hulself teen hul kompetisie meet, so dit is ‘n baie belangrike hulpbron.”
– Lees meer by Tourism Update
– Volg Nuus24 op Twitter