Sederberg toe in ’n sedan
2011-02-23 09:34
Sederberg 101
Die pad
Die pad van die N7 af tot by Op-die-Berg is meestal goed. Hier is ’n paar sinkplaatdele waar ’n voertuig met lang bene beter sal vaar, maar as jy stadig ry, sal jy regkom.
Omdat dit grondpad is, is dit ’n goeie plan om die banddruk tot tussen 1,8 en 2 bar te verlaag.
Daar was ’n plan om 37 km van die pad te teer – van die N7 tot die Eikeboombrug naby Driehoek – maar dit het gesneuwel en uiteindelik is net 5 km van die pad naby Algeria geplavei. Dis ’n teer punt onder die inwoners.
Brandstof
Daar is nie ’n enkele vulstasie in die Sederberg nie. Onthou maar om jou tenk op Clanwilliam of Citrusdal vol te maak voordat jy die berge invaar.
Selfoonontvangs
Geen. Hier is openbare telefone by die meeste kampterreine en verblyfplekke.
Stap
Die Sederberg is ’n stappersparadys, maar hou in gedagte dat die weer binne ’n uur of twee kan verander. Neem altyd warm klere, sonroom en kos en water saam. Dra behoorlike skoene of stewels en sê vir iemand waarheen jy gaan en wanneer jy beplan om terug te wees.
Ekstra inligting
Peter Slingsby se kaart van die Sederberg (weergawe 7.1) is ’n moet. Dit kos R96 by www.themaps.co.za.
Klik hier vir meer oor die Sederberg en die roete.