SAL keer dat passasiers in Londen gestrand sit
2012-02-06 08:00
Johannesburg – Die vervanging van kleiner vliegtuie met groteres wat meer passasiers kan vervoer, het voorkom dat passasiers van die Suid-Afrikaanse Lugdiens (SAL) Maandag weens die sneeu in Londen gestrand sit.
Volgens Dileseng Koetle, SAL-woordvoerder, is reeds Saterdag besluit om vliegtuie met groter passasierskapasiteit op vlugte na Londen te gebruik.
Dit is gedoen toe dit bekend geword het Heathrow-lughawe in Londen sou gister sowat 30% van alle vlugte kanselleer weens die sneeu en ys wat dié naweek in die Britse hoofstad verwag is.
Sowat 15 cm sneeu het Saterdagnag in die stad geval.
Heathrow het op sy webwerf, gesê hy het besluit om die vlugte te kanselleer om vertragings te probeer voorkom.
Dit is vir Heathrow byna onmoontlik om enige vertragings van vertrekke te verwerk, omdat die lughawe feitlik teen sy volle kapasiteit werk.
Wanneer vertragings gebeur, neem dit etlike dae om die agterstand in te haal.
– Volg Nuus24 op Twitter
- Beeld