SAA beboet oor vals advertering
2011-10-28 10:26
Kaapstad – Die Suid-Afrikaanse Lugdiens (SAA) is met $55 000 (R435 000) beboet deur die Amerikaanse departement van vervoer (DOT) nadat hulle lugvaartwette en die departement se reëls oor “misleidende prys”-advertensies oortree het.
Destination Southern Africa, wat vlugpakkette vir die lugredery, sowel as sy eie toere bemark, is ook ‘n boete van $20,000 (R159 000) opgelê.
Hierdie boetes volg nadat Lion World Travel in September 2010 met $20 000 (R159 000) beboet is nadat hulle die departement se reël oor volprys-advertensies oortree het.
Lion World Travel bemark ook toere vir SAA.
“Wanneer passasiers ‘n vliegkaartjie of ‘n toer wil bespreek het hulle die reg om te weet wat die volle prys is wat hulle gaan moet betaal,” het Ray LaHood, die VSA se sekretaris van vervoer, gesê.
“Ons verwag van lugrederye en kaartjie-agente om hul passasiers regverdig te behandel en ons sal aksie neem as hulle ons reëls rakende die advertering van pryse oortree.”
‘n Ondersoek het getoon dat advertensies op beide maatskappye se webwerwe nie regeringsbelasting en fooie genoem het wat bykomend tot die geadverteerde prys betaal moet word nie.
– Lees verder by Tourism Update
– Volg Nuus24 op Twitter