SA kan 'duurste lughawens in die wêreld hê'
2011-10-18 10:07
Kaapstad – Die internasionale lugvaartvereniging (Iata) het tydens ‘n konferensie van die vereniging van Suider-Afrikaanse lugdienste (AASA) in Durban beklemtoon hoe belangrik die lugvaartbedryf vir Suid-Afrika se ekonomie is.
Tony Tyler, Iata se direkteur-generaal, het verlede week by die konferensie gewaarsku dat die land binnekort die duurste lughawens in die wêreld kan hê.
Hy het Suid-Afrika geprys vir sy wêreldklas-infrastruktuur, maar het bygevoeg: “Die 161% toename in fooie van Acsa wat oor die volgende vyf jaar toegelaat word is ‘n duidelike aanduiding dat daar baie is wat sal moet verander.
“As fooie so verhoog word kan Suid-Afrika die duurste lughawens in die wêreld hê. Dit is nie volhoubaar nie en ek is gretig om aan ‘n positiewe dialoog deel te neem oor hoe ons vorentoe kan beweeg om die lugvaart-infrastruktuur meer mededingend te maak.
Volgens Solomon Makgale, kommunikasiebestuurder van Acsa, het Suid-Afrika nog lank nie die duurste lughawens in die wêreld nie.
Makgale het gesê Acsa vergelyk hul tariewe met ander en stem nie met hierdie stelling saam nie.
In ‘n studie wat in 2009 gedoen is, was Suid-Afrika 40ste uit die 50 grootste lughawens in die wêreld.
– Lees meer by Tourism Update
– Volg Nuus24 op Twitter