SA Toerisme wil honderde duisende toeriste lok
2011-08-11 11:35
Kaapstad – Volgens SA Toerisme sal sy nuutste veldtog honderde duisende oorsese toeriste oor die volgende paar jaar na Suid-Afrika lok.
Die nuwe veldtog, wat glo ‘n uitbreiding is van die eerste fase, “20 ervarings in 10 dae” wat verlede jaar geloods is, gaan op BBC World en CNN International uitgesaai word. Dit sal ook binnekort op die National Geographic-kanaal te sien wees.
“Wanneer al hierdie elemente in plek is sal die groter veldtog meer as ‘n miljoen mense bereik,” het SA Toerisme in ‘n mediaverklaring gesê.
In die veldtog word daar op vier paartjies gefokus, een elk van China, Duitsland, Angola en Brasilië wat deur Suid-Afrika reis.
“Hierdie veldtog praat met die teikenmark in hul eie tale, in hierdie geval in Mandaryns, Portugees en Duits. Sterk aanlyn-inhoud skep gesprekpunte oor Suid-Afrika,” het Roshene Singh, hoof-bemarkingsbestuurder van SA Toerisme, gesê.
“Ons mikpunt met die veldtog is eenvoudig. Ons wil gewone mense gebruik om te wys hoe toeganklik ons bestemming is; om te wys hoeveel hulle die ervarings geniet wat Suid-Afrika bied.”
Die veldtog kan op die Suid-Afrikaanse Toerisme-webwerf gesien word.
– Lees meer by Tourism Update
– Volg Nuus24 op Twitter